Kritisk til trafikksikringplan

Lindås sitt krav må verta at planen vert meir konkret når det gjeld fordeling av midlar til fysiske tiltak, meiner rådmannen.

Frå 2010-2013
Planen som gjeld 2010-2013 skal til uttale i Plan- og miljøutvalet i Lindås 18. august. Rådmannen tilrår at handlingsplanen må innehalda konkrete tiltak basert på kommunane sine eigne planar.
Frå Lindås kommune vert det peika på at planen berre inneheld ein generell pott med pengar som fordelast kvart år i eit planleggings- og byggjeprogram. Det verkar rart når kvar kommune har sine eigne trafikksikringsplanar med konkrete tiltak.

Mange ulukkestreknngar
Lindås-rådmannen peikar på at kommunen har fleire høgt belasta ulukkesstrekningar. Det kjem og fram i fylkesplanen, og forklaringa er naturleg nok av at E39 går mange mil gjennom kommunen, samt at ein har fylkesveg 57 som gjennomgangsveg og hovudveg mellom Bergen og Mongstad.
Tala viser at kommunar utan gjennomgangsvegar har mindre ulukker.

­– Prioriter Knarvik-Mongstad
Lindås ber heilt konkret om at fylkesveg 57 mellom Knarvik og Mongstad må få midlar som kan redusera talet på skadde og drepne. Med så mange skadde og drepne som tala viser for Lindås, må dette medføra at kommunen vert sterkt representert i fylket sin trafikksikringsplan, er kravet frå rådmannen.
Dersom fylket seier nei til å ta tiltak frå kommunane sine planar inn i fylkesplanen, er kravet frå rådmannen i Lindås at fylket let kommunane få ei meir aktiv rolle når dei årlege tiltaka vert fastsette.