Kulturpris til musikalsk eldsjel

– Jane Westervik er ei dyktig dame. Ho får prisen for arbeidet ho har lagt ned i sommarmusikkskulen for skulekorpsmusikantar, Oster Brass og Eikanger Bjørsvik Musikklag, sa ordførar Astrid Aarhus Byrknes under kommunestyre torsdag. Det var ein stolt ordførar som kunne overrekka eit gravert fat og ein sjekk til årets prisvinnar.

Over 500 konsertar
Westervik har vore fast inventar i musikkmiljøet i Nordhordland i ei årrekkje. På tjue år har ho spelt meir enn 500 konsertar, deltatt i 20 NM for brassband og vore med på like mange Siddis Brass. Westervik har spelt i 8 EM og vore med på 12 plateinnspelingar. Ei merittliste stor nok til å ta pusten frå dei fleste.

I tilegg til å vera aktiv i Eikanger Bjørsvik Musikklag er ho også dirigent for Oster Brass og eldsjel bak «Feriespelet» på Ostereidet som hadde ti års jubileum i år.
Stolt og glad

– Eg er veldig overraska, stolt og glad. Eg forstod ikkje kva Jostein Mykletun ville då han ringt til meg. Eg trudde rett og slett at han hadde ringt feil, sa Westervik under prisutdelinga.

Ho er spesielt glad for at kommunen har trekt fram feriespelet på Ostereidet i grunngjevinga for prisen.
– Det er eit arrangement som me i korpsmiljøet er veldig stolte av. I år var det om lag førti menneske i aksjon i tre dagar for å arrangere dette. Dei siste åra har me hatt 90 unge musikantar med. Det er veldig kjekt at kommunen set pris på aktiviteten. Det er mange som gjer ein stor innsats. Eg trur kanskje Lindås er den kommunen i landet som har flest skulekorps i førstedivisjon. Det er imponerande at same kommune har heile tre skulekorps i noregstoppen, seier Westervik.