Lakselus skremmer

 Eg har fått fisk med lakselus før og, men då har det vore ein eller to. På den fisken som eg fekk denne gongen, hadde alle mange lus, og den som hadde flest, hadde 18, fortel Kaspar Løtvedt Kirkeli til Strilen.
Han tykkjer det er skremmande at det er så mykje lus på fisken, og han meiner det har samanheng med eit fiskeoppdrett som har kome ute i Fensfjorden, ikkje så langt frå Vabø.

Får plager
Familien til Kaspar har hytte på Lindneset, på austsida av vågen som går inn til Vabø. Sidan han har vore andre stader på ferie i sommar, var det først i førre veke han prøvde fiskelukka i Storelva, som kjem ned frå Natås og renn ut inst i vågen på Vabø. Då fekk han altså åtte sjøaurar mellom 1,5 og 0,5 kilo.
– Du såg på fisken at han var plaga av lusa. Fleire hadde sår der lusa sat, og andre hadde fått deler av finnane oppetne, fortel Kaspar.
Ein kunne også sjå at fisken hadde lus på måten han hoppa på, meiner Kaspar.
– Han hoppa for å få av seg lusa, seier han.

Vert sjuk
Sjøauren går opp i Storelva for å gyta, men og for å verta kvitt lusa, for ho toler ikkje ferskvatn.
– Men sjølv om lusa forsvinn, kan fisken dauda. Det går sopp i såra som lusa har laga, forklarar den fiskeinteresserte 16-åringen.
Difor fryktar han for aurestamma i Storelva, som tidlegare var rekna for å vera ei svært god fiskeelv.

Også andre
Kaspar Løtvedt Kirkeli fortel at det ikkje berre er han som har fått fisk med lakselus. Også andre han har snakka med, har fortalt at dei finn mykje lus på fisken i år.

Les heile saka i Strilen si papiravis laurdag.