Lindås på veg mot 15.000

– Her er broren min, Ilian, viser søstera Melina Isadora Lid Myhr (3 ½). Vesleguten vart fødd 28. juni i år og var ein av Lindås sine 49 nyfødde i andre kvartal. Han er dermed med på å løfta Lindås oppover mot 15.000 innbyggjarar. Foreldra til dei to heiter Maren Beate Lid Klokkeide og Ivan Myhr, og familien bur i Bjørsvik.     (Foto: Hans E. Storheim).

Medan utkantkommunane går tilbake med i alt tretten innbyggjarar, vert dette meir enn vege opp av plussen i dei andre kommunane i regionen.

Dette går fram av tal frå Statistisk Sentralbyrå (SSB), som la fram nye folketal denne veka.

Den største kommunen har størst auke i reine tal, Lindås går fram med 108 innbyggjarar i løpet av andre kvartal. Med monaleg fleire fødde enn døde, og i tillegg stor tilflytting, er kommunen på god fart mot 15.000 innbyggjarar om denne trenden heldt fram.

Frå utlandet
Tala frå SSB viser også at kvar fjerde nye borgar i Nord­hordland og Gulen kjem frå utlandet. Medan flyttinga til og frå andre stader i kongeriket nesten går i null, når ein ser tilflyttinga opp mot fråflyttinga, er biletet eit anna for flytting til og frå utlandet. I alt flytta det 105 menneske til regionen i andre kvartal, medan berre 16 flytta andre vegen.

Av den netto tilflyttinga på 125 utgjer altså dei frå utlandet 89 menneske.

Fødselstal
Lindås har fått 49 nyfødde i løpet av andre kvartal, Meland 15 og Radøy hakk i hel med 14. Austrheim har fått åtte nye borgarar, men så er det færre og færre ned til Modalen på botn, med berre ein ny strek i folketalet.

På fylkesnivå har Horda­land ein vekst på 1.614 i dette kvartalet. Sogn og Fjordane har ei rekkje kommunar som slit med fråflytting, og folkeveksten fylket sett under eitt er på 426 menneske.