Lindex opnar trass i forbod

Kva som no skjer, er eit ope spørsmål. Plan- og utbyggingssjef Tor Hegle i Lindås har informert lensmannsetaten i Nordhordland om at det har føregått ulovleg byggjearbeid i lokala, men saka har ikkje vore politimeldt for å få stansa arbeidet eller opninga.

Plan- og miljøutvalet i Lindås har sete i møte i dag, og på møtet kom det fram at administrasjonen ikkje har ønskt å politimelda aktiviteten i Lindex-lokala så lenge det ikkje har vore opna noka forretning.

Kommuneleiinga har innteke denne haldninga trass i at det på ei synfaring i lokala 22. januar vart dokumentert med foto kor langt ombygginga då hadde kome. Rett etter synfaringa vart det sendt ut skriftleg stoppordre som ikkje har vore etterkome.

Lindex er leigetakar i Knarvik Senter, medan det er selskapet Songleite Eiendom som byggjer om lokala.

Lindås kommune har reagert på at det opphavlege butikklokalet vert litt utvida ved at det skjer ei fasadeendring. Litt av det eksisterande trafikkarealet på utsida vert dermed omgjort til butikkareal. Dessutan vert eit tidlegare lagerrom endra til butikk.

Lindås kommune meiner at slikt byggjearbeid utløyser plankrav eller søknad om dispensasjon. Kommunen har aldri motteke nokon fullstendig dispensasjonssøknad.

Ansvarleg søkjar for ombyggingsprosjektet, Takstpartner Vest, er usamd med kommunen i korleis dei tolkar sitt eige plankrav.