Meiner media har låst Overå-saka

– Aktiv bruk av støttegruppe, og stor bruk av media, har gjort sitt til å sementera situasjonen på Ostereidet, meiner advokaten for Lindås kyrkjelege fellesråd, Anne Marie Due.

Synspunktet kom fram i samband med at ankesaka til tidlegare kateket i Ostereidet sokn, Leikny Overå, starta måndag i Gulating lagmannsrett i Bergen.
Det er sett av fem dagar til saka, og første dagen gjekk med til innleiingsføredraga til advokaten hennar, og til advokaten til arbeidsgjevaren Lindås kyrkjelege fellesråd.

– Aktiv bruk av støttegruppa for Vilhelm og Leikny Overå har auka splittinga i Ostereidet-bygda, sa advokat Due.

Ho sa også at det i samband med siste soknerådsval var aksjonar for å stryka dei kandidatane som ikkje støtta Vilhelm og Leikny Overå.

– Det var vorte eit heilt enorm engasjement i bygda, noko som har gjort sitt til å sementera situasjonen, sa Due.

Advokat Nils Kristian Ormestad Lie, som representerer Overå i saka i lagmannsretten, kommenterte i retten at det ikkje var noko i dei konkrete medieoppslaga som viste til at ekteparet Overå sjølv hadde teke kontakt med media.

– Nei, men dei har heller ikkje gjort noko for å hindra dette, repliserte Due.

 
Oppseiing
Leikny Overå er oppsagt frå stillinga si som kateket, noko arbeidsgjevaren Lindås kyrkjelege fellesråd har grunngjeve med samarbeidsproblem i staben på Ostereidet.
I retten i går vart det vist til at to av dei andre tilsette mellom anna meinte at det var uklart om det var sokneprest Vilhelm Overå eller ektefellen kateket Leikny Overå som eigentleg avgjorde saker.
Overå har tidlegare ført oppseiinga inn for Nordhordland tingrett, der ho tapte saka. Denne veka er anken til handsaming i Gulating lagmannsrett.
 

Ville ikkje flyttast
Det vart i retten måndag vist til to rapportar som vart utarbeidde om arbeidsmiljøet på Ostereidet-kontoret. I den første vart det konkludert med at både sokneprest Vilhelm Overå, kateket Leikny Overå og kantor Boris Kuprijanov måtte vekk frå kontoret. Arbeidsgjevaren sin advokat sa i retten måndag at dette var «noko i overkant».

– Fellesrådet er samde i at konklusjonen om at alle tre må vekk frå teamet, var noko i overkant. Ein er samde i vurderingane, men ikkje på det bastante om at alle tre må vekk, sa Due i retten.

 
– Som eit sjokk
Overå sin advokat refererte Leikny Overå på at det kom som eit sjokk då arbeidsgjevaren la fram at det var store samarbeidsproblem ved kontoret, og sa at dette ikkje var noko ho hadde kjent til før Åge Clausen la det fram i eit møte om saka.

Tysdag skal dagleg leiar i Lindås kyrkjelege fellesråd, Åge Clausen, forklara seg i retten. Det skal også mellom andre Leikny Overå, Vilhelm Overå og kantor Boris Kuprijanov.