Mindre hytteavfall, men framleis ofte overfullt

Tal NGIR samlar inn i samband med avfallshentinga viser at det i snitt er ti prosent mindre hytteavfall i 2010 enn i 2009. Når det likevel stundom er fulle konteinarar å sjå rundt om, skuldast det ofte at fastbuande eller hytteeigarar har lessa av ein hengar.

– Det skjer ofte at konteinaren er full igjen same dagen som det er tømming, seier Erlend Kleiveland, dagleg leiar i NGIR.

Det interkommunale renovasjonsselskapet har eigne rutinar for tømming på sommaren, i den perioden der både hytter og avfallskonteinarar har størst bruk. Men tømming to gonger i veka er ikkje nok når det dukkar opp hengarlass med avfall, avfall som skulle ha vore levert direkte til ein av dei tre gjenvinningsstasjonane.

– I høve til tal hytter er det rikeleg kapasitet på hyttekonteinarar. Utfordringa er at desse vert nytta til avfall som burde vore levert til ein av gjenvinningsstasjonane, seier Kleiveland, som legg til at dette problemet varierer frå område til område i distriktet.

– Og det er mindre problem med dette der ein har små innkastluker eller låste konteinarar.

NGIR har planar om å bytta ut fleire konteinarar med stor luke med slike som har lita innkastluke eller lås.

– Me har bestilt ein god del slike konteinarar. Då vert det sjeldnare at det vert lagt att ein sofa og slikt som skal på gjenvinningsstasjonen, seier Kleiveland.