Mista lappen, teken på nytt

Det var i to femtisoner den 30 år gamle sogningen ikkje klarte å styra gassen. Først tok nordhordlandspolitiet frå han førarkortet etter at han måkte gjennom 50-sona i Knarvik i 81 kilometer i timen. Dette var søndag kveld klokka 19.40.

Fekk kjøra heim

Sidan mannen lova bot og betring og berre skulle strake vegen heim att til Sogn, fekk han lov å kjøra vidare utan førarkort. Men alt klokka 20.16 vart mannen teken på nytt, denne gongen av UP i femtisona på Matre. Då utrykkingspolitiet spurde etter førarkortet, kunne ikkje mannen anna enn å tilstå at dette hadde Vangberg teke frå han i Knarvik berre ein halvtime før. Om mannen ikkje hadde like stor fart gjennom 50-sona på Matre som i Knarvik, var farten stor nok til eit førelegg.

Førelegg på førelegg
– Dette kjem i tillegg til førelegget me gav han i Knarvik. Han kan også rekna med å verta verande lenger utan førarkort, seier politioverbetjent Kjell-Idar Vangberg ved Nordhordland lensmannsdistrikt.
– Fekk mannen lov å kjøra heim andre gongen også?
– Ja, han fekk faktisk det, ler Vangberg, som reknar med at mannen fekk seg ein lærepenge han kjem til å hugsa ei stund.
Under fartskontrollen i Knarvik, vart totalt fire tekne, men det var berre sogningen som mista førarkortet.