Mongstad skal få forskingsløft

– Det er to ulike og viktige prosjekt for Mongstad som er offentleggjort i dag, seier ein nøgd gruppeleiar i Lindås Ap, Tove Linnea Brandvik, til Strilen onsdag ettermiddag.
Ho deltok då på ei felles markering i Knarvik Senter, der dei lokale Ap-laga set fokus på både midlar via krisepakken og at det kjem statlege midlar til heving av U-864 ved Fedje, samt forskingssatsinga som er offentleg same ettermiddag.
At regjeringa sine vedtak kan tilføra Mongstad og resten av regionen kring fem milliardar kroner, feirar partiet med kake i senteret. I tillegg vert partiet sin ordførar på Fedje, Kristin Handeland, heidra for sin innsats for å få regjeringa til å gå inn for heving av U-864..
Den eine tildelinga som vart kunngjort i går, gjeld Christian Michelsen Research i Bergen. Senteret har fått tildelt to statlege senter for fornybar energi. Det eine skal forska på CO2-lagring. Begge sentara skal liggja i Bergen.
Frå Ap sitt programforslag, som vert lansert torsdag, kan Tove Brandvik og avsløra at partiet går inn for utvikla Mongstad til eit permanent internasjonalt forskingssenter for lagring av CO2.
«Noreg skal verta verdsleiande når det gjeld handtering av CO2 frå kraftverk. Målet er å lukkast med å utvikla ny teknologi som i neste omgang kan brukast på kol- og gasskraftverk rundt om i verda, seier Helga Pedersen, leiar av Ap sin programkommité.