Motvind for vindkraft i Gulen

Han hadde si fulle hyre med å svara på alle spørsmåla frå salen, prosjektleiar Johnny Hansen frå selskapet Zephyr AS, på folke­møtet i grendehuset på Haveland. Det var den planlagde utbygginga på Dalsbotnfjellet som var tema, og det var tydeleg at dette prosjektet hadde mange lokale motstand­arar.

Zephyr har planar om å byggja rundt 50 vindturbinar i dette fjellområdet, og ei målemast har alt stått på fjellet sidan 30. mars. Den viser så langt svært lovande resultat når det gjeld vinden, kunne Hansen fortelja.

Øydeleggja
Men frå salen kom det klare synspunkt på at dette fjellområdet er eitt av dei finaste i Gulen, og at ei vindkraftutbygging ville øydeleggja det som friluftsområde.

– Her er det snakk om store naturinngrep. Me tykkjer fjellet er fint som det er, sa Ivar Hantveit og fekk støtte av fleire.

Ei vindkraftutbygging vil med­føra ei massiv vegbygging i tillegg til alle møllene som skal reisast. Totalt kan det vera snakk om opp mot 40 kilometer veg.
Hansen kunne fortelja at det mest aktuelle er å føra vegen inn i området via Bjørndalen.

Kven tener?
Mange i salen var også interesserte i kven som ville tena på ei vindkraftutbygging. Kva vil grunneigarane sitja att med? Kor store inntekter vil kommunen få? Er det i det heile noko å tena på vindkraft? Vil verdien av hytter i området gå ned viss det kjem vindmøller?

Hansen ville ikkje gå i detalj om kva avtalen med grunn­eigar­ane skulle innhalda, men understreka at dei ville få sine inntekter uavhengig av kor godt prosjektet går økonomisk.

Åtte millionar
Når det gjeld kommunen, vil den først og fremst få inntekter via eigedomsskatt. Totalt er det snakk om å investera 1,65 mil­liardar kroner på Dalsbotnfjellet, og det vil gje kommunen om lag åtte millionar kroner i året i skatteinntekter.

– Og så vil det gje 4-6 faste arbeidsplassar, sa Hansen.
Når det gjeld innteninga på vindkraft, er den avhengig av gunstige støtteordningar og grøne sertifikat, sa  Hansen, som viste til at Zephyr tener pengar på utbygginga på Mehuken i Vågsøy kommune i Nordfjord, det einaste prosjektet selskapet så langt har realisert.

Setja opp mast
– Kvifor set de ikkje opp ei vindmølle, slik at folk kan sjå korleis ho vil ta seg ut i terrenget? vart det spurt frå salen.

– Det er trass alt ei investering på 20 millionar kroner, svara Hansen.
Han fekk også spørsmål om kvifor ein ikkje har laga ein animasjon av korleis utbygginga vil sjå ut i terrenget, slik SAE Vind har gjort på Brosviksåta.

– Den var svært illustrerande og ganske skremmande, sa Leiv Henriksbø.
Hansen påpeika at Zephyr er kome langt kortare i sin prosess enn det ein er på Brosviksåta, men at det kan godt henda at dei også vil laga ein slik animasjon.

Luftsport
Men det var ikkje berre vind­møllene det vart stilt spørsmål om på møtet. Viss det vert ei utbygging, må det også byggjast nye linjer for å føra krafta inn på nettet. Difor må det byggjast ei ny linje til trafostasjonen på Frøyset i Masfjorden. Viss både Brosviksåta og Dalsbotnfjellet får konsesjon, er det meininga å føra straumen via ei felles linje ut på nettet.

– Viss me får ei nye 132 kilo­volt linje forbi flyplassen vår i Dalsbygda, er det kroken på døra for luftsportmiljøet i Gulen, sa Kjell Borge.

Også frå fleire andre kom det innvendingar mot dei traseane som Zephyr har skissert når det gjeld den nye kraftlina.

– Og kvifor vert ikkje me som er grunneigarar der kraftlinja skal gå, innkalla til samrådsmøte på same måte som grunn­eigar­ane der møllene skal stå? vart det spurt.

Einsleg svale
Men sjølv om dei aller fleste som hadde ordet på møtet, uttrykte motstand eller sterk skepsis mot prosjektet, var det også nokon som var for.

– Eg tykkjer me har ansvar for miljøet for komande generasjonar. Vindkraft kan erstatta kolkraft og annan ureinande kraftproduksjon, og me er faktisk ein del som er positive til vindmøller her i Gulen, sa Åse Haugen, som bur på Haveland.

Ho meiner folk heller bør koma med sine innspel og påverka korleis vindparken vert, i staden for berre å vera negative.
Haugen etterlyser og at dei politiske partia i Gulene er klarare på kva dei står for når det gjeld vindkraft i kommunen.

Kommunen viktig
Og at det er viktig kva kommunepolitikarane meiner, vart understreka av Johnny Hansen.

– Viss det er nokon NVE (Noregs vassdrags- og energidirektorat) høyrer på når dei skal avgjera om dei skal gje konsesjon eller ikkje, er det kommune­styret. Eg kjenner ikkje til noka sak der NVE har sagt ja viss kommunestyret har sagt nei til ei utbygging, sa Hansen.

– Ja, då får me syta for at me får valt eit kommunestyre som seier nei til all vindkraft i kommunen, vart det kvittert frå salen.

Innspel viktig
På møtet deltok også Ulla Ledje frå Ambio Miljørådgiving. Det er dei som har ansvar for konsekvensutgreiinga som skal lagast i samband med prosjektet. Ho understreka at det er viktig at alle som har innspel til planane, kjem fram med dei skriftleg. For det er folk i lokalmiljøet som sit på lokalkunnskapen. Og ho lova at alle innspel skulle få ei seriøs behandling.
Konsekvensutgreiinga skal ta for seg ei rekkje tema, som påverknad på natur og friluftsliv, landbruk, dyre- og fugleliv, kor synleg vindparken vert frå ulike hald, støyproblem, skugge frå vindmøllene og liknande.