Norovirus på Knarvik sjukeheim

– Noroviruset gjev feber, diare og kvalme. Det er ikkje farleg, men det er ikkje heldig om eldre og sjuke vert smitta, difor har me innført restriksjonar på besøk og innført inntaksstopp på sjukeheimen inntil vidare, seier kommunelege Lars K. Lie (bilde).

Tysdag tok han kontakt med avisa for å informera om utbrotet.

Til no er 16 bebuarar og 13 tilsette råka av sjukdommen.

– Det er to avdelingar som er ramma av sjukdommen. Eg fekk dei første meldingane før helga, og me har sett i gang ei rekkje tiltak for å unngå at det spreier seg ytterlegare. Me har sett i gang isoleringstiltak. Og me vil halda dagavdelinga og seniorsenteret stengt inntil utbrotet er over, seier kommunelegen.

Dei fleste som vert smitta er dårlege i eitt til to døgn.

– Det har vore liknande utbrot på Haukeland sjukehus og på andre sjukeheimar tidlegare og me vil følgja dei prosedyrar me har for å handtera slike utbrot, seier Lie.

Han bed pårørande om å vera litt tilbakehaldne med å besøka sjukeheimen dei neste dagane.

– Me ønskjer ikkje så mykje trafikk ut og inn av bygget no. Om pårørande er usikre på om det er greitt å koma på besøk og om eller ikkje er det ein fordel om dei tek kontakt med sjukeheimen på førehand, seier kommunelegen.

Han rår også folk til å vera nøye med handhygiene for å minska risikoen for å verta smitta. Folk som har vore sjuke vert bedne om å halda seg borte frå arbeid i 48-timar etter utbrotet er over. Dette gjeld spesielt personar i yrke der dei omgås mykje folk eller jobbar med matvarer.