Ny gjerde-tabbe

– Eg synest dette er rart, seier Bjarne Foss i ein kort kommentar.

Leiaren i kontrollutvalet, Ingeborg Askeland, synest det er ille at kommunen igjen er tatt for ein administrativ tabbe gjennom feil lovbruk.

– Det er ekstra ille med bakgrunn i forvaltningsrapporten som påviste mange feil i saksbehandlinga. Slikt gjer at tilliten til kommunen vert tynnsliten, seier Askeland.
Feilen Lindås har gjort denne gongen, er å bruka den nye Plan- og bygningslova frå 2010, i staden for den gamle frå 1985.

Nytt krav frå Planutvalet
Foss ønskjer berre å visa til at kommunestyret i september oppheva eit krav om tvangsmulkt som planutvalet hadde kom med. Vedtaket kom etter ein sterkt kritisk rapport, som blant anna påviste at administrasjonen har unnlete å rettleia Foss som søkjar. I januar i 2011 kom saka på nytt opp i Planutvalet. I tråd med rådmannen si tilråding vart det gjort nytt vedtak om fjerning av gjerdet og tvangsmulkt.

Det vedtaket klaga Foss Eiendom på, og Fylkesmannen har tatt klagen til følgje. I juli oppheva han Lindås sitt siste vedtak.

Kva no?
– Som leiar i Kontrollutvalet kritiserer eg feil lovbruk, ikkje korleis ei sak vert vurdert politisk, seier Ingeborg Askeland.
Ho opplyser at Fylkesmannen si oppheving av vedtaket til Planutvalet skal opp i Kontrollutvalet i dag, tysdag.

– Men der skal opphevinga berre opp som ei referatsak. Fylkesmannen ber kommunen avgjera om gjerdet er søknadspliktig etter den gamle lova. Det vert det opp til administrasjonen å vurdera. Her er det spørsmål om finjuss, og det uttaler eg meg ikkje om, seier Askeland.

«Ikkje søknadspliktig»
Etter at eit tidlegare gjerde vart fjerna, vart det noverande på 1,5 meter sett opp i mars 2008.

Bjarne Foss meiner Fylkesmannen alt i 2007 slo fast at gjerdet ikkje er søknadspliktig. Der seier ein at «Vidare vil innhengningar med inntil 1,5 meters høgd korkje krevja søknad eller melding», noko Foss er sikker på må gjelda for dagens gjerde.

Fire år seinare tek ikkje Fylkesmannen med denne tolkinga. Kommunen vert no beden om å gå inn i den gamle lova frå 1985, for å vurdera om gjerdet er søknadspliktig.