Ny kommune får eigedomsskatt

Ikkje uventa var også Høgre sine fire no klar for å seia ja til eigedomsskatt, etter at partiet bad om ei utsetjing i førre runde.

– Det må kallast politisk tiktakkeri, meinte Grethe Lunde (KrF), noko gruppeleiar John bauge i Høgre ikkje let seg kava opp over. Han meinte ein hadde fått ei grundigare vurdering og ny informasjon, medan Lunde peika på at det var akkurat det same vedtaket som sist som låg på bordet, og som Høgre ville gå inn for.

Frp la fram ei tøff kuttliste på nesten fire millionar kroner, men fekk stort sett ramsalt kritikk for dei kutta partiet ville gjera, blant anna å avvikla kommunen sitt kulturkontor og kutta ytterlegare kring ei stilling i sentraladministrasjonen. Men så godt som alle partia rosa Frp for omsider å seia kor dei ville finna pengar dei andre vil ta inn i eigedomsskatt.

Vedtaket om å godkjenna ein økonomiplan for 2008-2011 med eigedomsskatt, vart som venta gjort mot Frp sine røyster. Dermed kan administrasjonen gå i gang med prosessen for å få taksert alle hus og hytter i kommunen, noko som kan kosta kommunen opp til 2 millionar kroner.  Bjørg Skarbø (Sp) er vald til leiar i takstnemnda. Dei andre medlemene er Helge Kolås (H) og Tove Karin Storheim (Ap). Det er også vald ei klagenemnd med André Michelsen (Ap) som leiar.

Den neste store debatten kjem til hausten, når politikarane skal avgjera kor høg promille-satsen for privat eigedomsskatt skal vera. Den satsen avgjer kva sum kvar enkelt må ut med.