Overå beheld kontoret sitt

– På vegner av ­ar­beids­­gjevar vart punktet om at Overå skulle få kontor ein annan stad, trekt tilbake. Han beheld kontoret i kyrkjebygget utan restriksjonar, seier Rune Joar Kysnes, som er tillitsvald for prestane i fagforbundet Teologene.

Det var prost Geir Sørebø og kyrkjeverje Åge Clausen som kalla inn til møtet måndag på vegner av arbeidsgjevar. I tillegg til Overå og Kysnes, deltok også sokneprest Harald Sundsbø på møtet, som tillitsvald for dei lokale prestane.

Sundsbø finn det ikkje rett å kommentera saka offentleg, anna enn å stadfesta at bispen sitt punkt om skifte av kontorplass er trekt tilbake.

Nye møte
Tillitsvald Rune Kysnes seier at konflikten på Ostereidet er vanskeleg og vil ta lang tid å løysa.

– For meg ser det ut til at situasjonen ikkje har vorte godt nok handtert frå starten av. Så har ulike episodar gjort striden meir og meir fastlåst. No er det avtalt nye møte, både for å avklara arbeidsfordelinga mellom Overå og vikarprest Jens Linde og eit møte med verneombod og alle tillitsvalde.

Eg veit ikkje om me vil lukkast, men målet er å prøva å starta med blanke ark og koma fram til ein handlingsplan, seier Kysnes.

Under tvil
Kysnes sitt utgangspunkt er at Overå skal halda fram som sokneprest på Ostereidet. Bispen har ved fleire høve tilbydd Overå stilling andre stader.

– Men kan ei fagforening akseptera at arbeidsgjevar set inn ein vikar til å ta over deler av jobben til Overå?
– Me har under tvil godteke ordninga for ein tidsavgrensa periode, og det har me gjort i samråd med Overå, seier Kysnes.

– Kan du forstå at Overå kjenner seg mobba og trakassert av bispen som sin arbeidsgjevar?
– Han har kome under eit stort press, så det kan eg forstå, seier Kysnes.