Passar munnen etter heftig symjetur frå Fedje

Amund Lerøy (33) frå Lerøy i Austrheim hadde snakka om symjeturen i fleire år, og onsdag måtte han til pers.

– Eg hadde fått litt pes frå arbeidskollegene på Aker Solutions på Mongstad, seier Lerøy.

Ingen reprise
Kollegene visste nemleg om at Lerøy hadde tankar om den dryge symjeturen, ein idé som først kom opp under ein badetur til Radøyhallen.

– Eg driv ikkje så aktivt akkurat, men eg er på symjing i Radøyhallen for trimmen sin del.

Såpass godt trena er han at turen frå Fedje til heimkommunen gjekk unna på ein time og tre kvarter.

Langturen over Fedjefjorden freistar det ikkje å repetera.
– Kollegaene mine hadde vel ikkje heilt trudd at eg skulle klara det, seier Lerøy, som ikkje lovar nye symjeturar med det første.

– Eg må vel passa på kva eg seier etter dette, det er vel det beste.

Symjeturen gjekk frå Fedje og til næraste delen av Sævrøy, og attmed seg hadde Lerøy heile tida ein følgjebåt.

– Dei i båten skulle også halda utkikk etter brennmaneter. Eg var borti i ei manet likevel, men då var eg så kald at det ikkje gjorde noko.

Kald oppleving
Halvvegs til Sævrøy byrja det å verta heller kaldt, og mot slutten kom skjelvebygene. Lerøy hadde smurt seg inn med feitt for å verna seg mot det kalde vatnet, men etter nesten to timar i sjøen var det godt å komma på land.

– Eg hadde nok ikkje greidd så mykje lengre, seier Lerøy.

Å vera i vatnet er Lerøy elles godt van med, etter å ha drive ein del med både dykking og fridykking.

– Det er alltid moro å komma seg i sjøen.

Turen vart  gjennomført i badebukse.