«Solstikk» på ny skule

– Det er rett at elevane hengte opp teikningar mot sola, seier både rektor Olaf Hella og byggjeleiar Terje Fauske.
Dette var i januar. Då skapte låg sol store problem med å ha undervisning i fleire av klasseromma bak den imponerande glasfasaden på skulen sitt nybygg.

– Vart kutta
Hella seier at solskjerming var med på budsjettet frå starten av. Så måtte det kuttast for å halda ramma som var sett frå kommunestyret. Då rauk solskjerminga ut.
No har skulen bede om ei løysing på problema som sollys rett inn i klasseromma skaper.
– Me vil prøva å finna ei løysing, samtidig som me må halda ramma for prosjektet, seier byggjeleiar Terje Fauske på kommunen.
Hans problem er at siste overslaget viste ein sluttsum på 84 millionar kroner, medan politikarane har sett strek ved 82 millionar. Det skal sluttrekneskapen visa når prosjektet med tilbygg og oppussing er ferdig til juni.

Persienner?
– Me har fått ein pris på persienner på 300.000-400.000 kroner. Det synest me vert litt i dyraste laget, seier Fauske.
Bak den store glasfasaden er det åtte klasserom.
Problemet med sollyset er størst tidleg på vinteren når sola står lågt. Ekstra ille er det når det samstundes ligg snø, slik det har gjort i vinter.
– Eit utbygg på fasaden gjer at problemet vert mindre utover våren og sommaren, etter kvart som sola kjem høgare på himmelen, seier Fauske.