Solsvik gjev opp Garveriet-drifta

I ei årrekkje dreiv Margunn Solsvik Garveriet saman med Karsten Havreberg. Då han gjekk bort før jul i fjor, bestemte ho seg for at ho ville prøva å driva utestaden vidare. Men no kjem kontrabeskjeden, etter at ho ikkje har fått til noko ny avtale med huseigar.

– Eg ser meg nøydd til å innstilla drifta av Garveriet Restaurant AS frå 31. mars 2010. Det er ikkje med lett hjarte eg gjer dette, men det vil vera økonomisk ruin å halda fram med dei krava som vert sette fram av eigar, skriv Solsvik i ei melding på heimesida til Garveriet Restaurant AS.

Forsøk på forhandling
Den førre kontrakten Solsvik hadde med eigar Ole Tom Ones, gjekk ut ved nyttår. Og Solsvik har fått tilbod om ny kontrakt.

– Ja, det har eg fått. Men det er kva den kontrakten inneheld som er problemet. Husleiga går opp, seier Solsvik til Strilen.

Strilen får stadfesta hjå eigar at husleiga i nytt kontraktforslag går opp med 2.500 kroner.

– Det vert 30.000 kroner, og utgjer 9 prosent av omsetninga. Vanleg er å ta mellom ti og femten prosent, seier huseigar Ones.

Solsvik hevdar at det nye kontraktforslaget gjer det dyrare på fleire måtar, og at ho har gjort forsøk på å forhandla seg fram til ein rimelegare avtale.

– Eg veit kva som går og kva som ikkje går, seier Solsvik.

Då ho innsåg at det ikkje let seg gjera å få til ein rimelegare avtale, bad ho om utsetjing i tre månader. Det fekk ho.

– Eg vil gjerne avvikla på ein ordentleg måte, seier ho.

Kostar for mykje
– Det kostar for mykje å driva eit gamalt hus, seier Solsvik.

Det har også kosta Margunn Solsvik ganske mykje å prøva å få endane til å møtast. Frå ho overtok firmaet i juni, og særleg etter at Karsten gjekk bort, har det vore vanskeleg.

– Eg har fått magesår. Den perioden frå Karsten døydde og fram til no har vore tung, fortel Solsvik.
Oppe i det heile har ho også opplevd ei enorm støtte. Over 1100 personar har meldt seg på gruppa på fjesboka som vil støtta Margunn Solsvik i å driva utestaden på Garveriet vidare.
– Støtta er overveldande, seier Solsvik.

– Trur du støtta har noko å seia for utfallet?
– Ikkje for huseigar. Han går ikkje ned i husleige, seier Solsvik.

Frå første april vert det nye folk som driv Garveriet, og Solsvik er i gang med avviklinga.

– Dei tilsette grin, eg har sagt opp avtalane. Me har vel hatt ein 12-15 personar inne på timebasis i helgane, seier Solsvik.

Usikker framtid
Kva Solsvik skal ta seg til etter siste arrangement i mars, veit ho ikkje.

– No prøver eg å avvikla på ein ordentlig måte, og så tek eg påskeferie, som eg ikkje har hatt på femten år, seier Margunn Solsvik.