Storheimen nominert til «Årets eldsjel»

– Eg høyrer du har gjort ein fantastisk jobb for idrettslaget Alvidra, seier Inge Andersen i det han gjev Strilen-redaktør Hans Egil Storheim ein bukett blomar.
Midt under morgonmøtet til redaksjonen er generalsekretær i idrettsforbundet Inge Andersen på plass, med ein TV-fotograf frå NRK på slep.
– Og så kan eg invitera deg til Idrettsgallaen på Lillehammer i 2010.
Andersen er på plass for å vidarebringa beskjeden om at Hans Egil Storheim, ein av i alt 2.000 nominerte, er plukka ut til å vera mellom dei fem i landet som kan få prisen for 2009.
 
Driv Idretts-Noreg
– Det er eldsjelene som driv heile Idretts-Noreg, seier Inge Andersen, som kan visa til ei undersøking kring dette frå 2004.
– Då vart det gjort ei samfunnsanalyse av det frivillige arbeidet i Noreg, og ein kom til fram at det utgjorde 24.000 årsverk, eller sju milliardar kroner med ei gjennomsnittleg løn.
Rundt om kring i dei 12.000 idrettslaga i Noreg er det mange som gjer ein stor frivillig innsats, og no er fem av desse plukka ut til finalerunden i årets kåring. Av dei dei i alt 2.000 søknadene er fem silt ut, og i juryen som har gjort utvelgingsjobben finn ein Ingrid Kristiansen, Kjetil André Aamodt, Tove Paule, Marit Breivik, Eirik Kvalfoss og Anne Margrethe Hausken.
 
På TV i kveld
Vestlandsrevyen vil i kveld ha ei sak om at Storheim er nominert til eldsjelprisen, som finalekandidat for Vestlandet.
Hans Egil Storheim er også gjest i studio under lokalsendinga «Hordaland i dag» på NRK P1 i dag. Sendinga startar klokka 16.03 i dag.
Dei fem kandidatane kjem frå kvar sin kant frå landet, Vestlandet, Sørlandet, Austlandet, Midt-Noreg, og Nord-Noreg.

Les meir i Strilen torsdag.