Tess kåra til Årets bedrift

Laurdag var det utdeling av den høgthengande prisen, under Nordhordland Handverk- og industrilag sin årsfest på Alver Hotel. Juryen hadde etter vurdering av dei tre nominerte komme fram til at den lokale Tess-avdelinga var fremst av dei tre priskonkurrentane.

– Tess avdeling Nordhordland er i gang med utviding av hovudbasen på Mongstad, har starta avdeling i Alversund, og i 2010 også opna avdeling i Sløvåg i Gulen. Bedrifta har ekstra høgt fokus på personalpolitikk, med trivsel og vidareutvikling av eigne medarbeidarar som topp prioritet, las Margunn K. Bjørnestad opp frå juryen sine vurderingar.

I tillegg til regionbanksjef Bjørnestad, har også dagleg leiar i Nordhordland handverk- og industrilag Svein M. Nordvik vore med i juryen, og redaktør i Strilen Hans Egil Storheim.

– Stolte
– Me var stolte berre over å verta nominert til prisen, seier Hege Krossøy, som er driftsleiar ved Tess på Mongstad.

Ho tok i mot prisen på vegner av bedrifta, av di dagleg leiar Janne Hellebø er i USA i samband med jobben.

– Når me først var nominerte hadde me eit håp om å vinna, men me trudde det ikkje.

Juryen har vurdert fleire enn dei tre som vart nominerte, og det har vore ein tett kamp om å komma fram til først tre nominerte og deretter ein vinnar.

– No er me i Tess berre kjempeglade, seier Krossøy, som etter prisutdelinga kunne sanka gratulasjonar både frå kollegaer i Tess og dei andre gjestene på årsmiddagen.

Bratt auke
Tess avdeling Nordhordland har opplevd ein bratt auke dei siste åra, både i talet på tilsette og i omsetnad. I dag har verksemda tjue medarbeidarar fordelt på dei tre avdelingane i distriktet, 25 år etter starten på Mongstad.

– Den flotte utviklinga er eit resultat av godt lagarbeid, med positive pådrivarar som gjev meir enn forventa, seier Krossøy.

Med seg til kontoret på Mongstad fekk ho glaskunst laga av Turid Grov. Grov er frå Lindås, men har no verkstad i Sandnessjøen.