Tok prisen

– Det er viktig å ikkje slutta å ta sjansar, sa gründer Ola Braanaas (t.h på bildet) etter at Firda Sjøfarmer vart tildelt prisen som Årets Bedrift.
Selskapet fekk prisen på årsfesten til Nord­­hord­­­land Handverk og Industrilag i Bergen laurdag, med Meland Arbeidssenter as og Knarvik Senterutvikling as som utfordrarar.
Prisen, for Årets Bedrift 2009, vart delt ut for 23. gong av Strilen og Sparebanken Vest. Profil og omdømme utetter, marknadsføring, produktutvikling, omstilling og nytenking er nokre av kriteria, saman med økonomisk resultat og skaping av arbeidsplassar.

– Effektiv leiing
I grunngjevinga frå juryen viste region­banksjef Jon Arild Hellebust til at vinnaren er ei bedrift med ein liten og effektiv organisasjon.
Juryen la vekt på at selskapet har bygd seg stegvis opp og posisjonert seg på ein måte som gjer at ein no kan nyta godt av gode tider i oppdrettsbransjen.
«Samstundes har selskapet framleis eit gründerpreg og er i gang med nye planar om utbygging. Eigaren har og medverka til å setja kommunen på dagsorden på ein offensiv og positiv måte», avsluttar juryen si grunngjeving.

– Fortent
Det var eigar Ola Braanaas som takka for tildelinga.
– Me ser at dei to andre nominerte er gode bedrifter, men me føler at me fortener prisen, sa Braanaas.
Han viste til at det vert lagt ned veldig mykje energi for å driva selskapet.
I takketalen retta Braanaas ei takk til adm. dir. Carl Erik Arnesen og alle dei andre tilsette.

– Ikkje mett
Braanaas viste til eit nyleg besøk i Latvia. Der hadde han opplevd at vikingane vart heidra, også norske vikingar, som til ei viss grad kan samanliknast med dagens oppdrettarar, som «erobrar verda» med laks og aure.
– Samstundes er det viktig å ikkje gje seg med å ta sjansar etter å ha oppnådd suksess, sa Braanaas.
Han viste til at selskapet i fjor hadde eit knallgodt år med kring 450 millionar kroner i omsetning og eit overskot på kring 100 millionar.

Sjekk på 30.000 kr
I juryen for årets bedrift har vore regionbanksjef Hellebust i Sparebank Vest, redaktør Hans E. Storheim i Strilen og dagleg leiar Svein M. Nordvik i Industrilaget. Nordvik kunne også gle seg over ein sjekk på 30.000 kroner frå banken til Industrilaget. Den skal gå til eit samråd om kompetansen mellom skuleverket og næringslivet i Knarvik 28. april.