– Useriøst å påstå dårleg vedlikehald

– Når Norges Miljøvernforbund ein time etter hendinga går ut og påstår at årsaka ligg i dårleg vedlikehald, ser me dette som useriøst.
Det seier Statoil Mongstad sin informasjonsleiar Jon Halstein Tjore etter utsleppet av olje og evakuering av alle tilsette måndag.

«Eit lita hending»
Etter nærare undersøkingar viser det seg at det var ti liter olje som lak ut via ein flens på koksanlegget. Sidan olja var oppvarma, var det ein viss fare for antenning.

– Og ut frå den låge terskelen me har for personellet sin tryggleik, vart alle 380 som var på jobb evakuerte, seier Tjore.

Han seier at Statoil karakteriserer dette som «ei lita hending».

– Det var verken utslepp til miljø eller skadar på personell eller materiell. Dette er ein operasjon som ein gjer mange gonger for året. Me går vidare med å kartleggja årsaka til at det lak ut olje, seier Tjore.

Kuttar ikkje vedlikehald
– Kva seier du til at Norges Miljøvernforbund fryktar dårleg vedlikehald sidan Statoil Mongstad går med underskot?

– Vår klare politikk er at innsparingar ikkje skal gå ut over vedlikehaldet. Det viser me i praksis ved at programmet for overflatebehandling går vidare som planlagt, trass vanskelege økonomiske tider, seier Jon Halstein Tjore.

Stiller spørsmål
Norges Miljøvernforbund er kritisk til om Statoil tek uønskte hendingar alvorleg nok.

«Vi stiller spørsmål om kor alvorlig ei hending må bli for at informasjonsleiar Tjore kan innrømma at ein har hatt ei alvorlig hending?! Når det går liv tapt ved anlegget, når alt liv i sjøområdet døyr eller når Mongstadområdet er ein saga blott?!»

Det spør Marita Bru i den lokale nærmiljøgruppa av Norges Miljøvernforbund i eit innlegg Strilen har fått etter utsleppet.