Ut av Venstre og inn i De Grønne

– Partileiar Spon­heim sin ros av at Rimi-Hagen vil flytta til Sveits, grunna den norske formuesskatten, var dropen som fekk begeret til å renna over, seier Leif Johnsen til Strilen.
Det er i ein tilfeldig samtale med avisa Johnsen avslører at han har skifta parti. Når avisa bed om nokre kommentarar, er Johnsen villig til det.
Overgangen tyder at Meland Venstre har misst ein markert støttespelar gjennom mange år. Johnsen har bak seg to periodar i kommunestyret, og har i tillegg vore medlem i skulestyre og kulturstyre.
– Eg kom til Meland i 1978, og det var Olaug Tveit som fekk meg inn i Meland Venstre kring 1980. Før det var det ein lærar på lærarskulen i Bergen verva meg for dette partiet, seier Johnsen, opphaveleg frå Haugesund.
Johnsen seier at han framleis har sans for Venstre som miljøparti. Men det passar han betre at denne profilen er endå sterkare hjå Miljøpartiet De Grønne.
– Men kan De Grønne klara å påverka norsk politikk?
– Partiet er lite no, men eg håpar at det kan verta større og få makt slik som i Sverige og andre europeiske land, seie Johnsen. Han har notert seg at tidlegare Krf-politikar Tom Sverre Tomren i Meland er nummer 5 på De Grønne si Hordalandsliste til stortingsvalet.
– Kjem du til å prøva å starta lokallag i Meland?
– Nei, sjølv har eg ikkje tid og overskot til det, seier Johnsen.