Vann første runde

– Skodvin ber oss berre venta eitt år med å leggja ned skulen, slik at me slepp å flytta på ungane. Eg vil ha betre svar frå Frp kvifor dei ikkje er med på det, sa Lene Fløysand (Sp).
– Nei, eg vil ikkje svara!

– Kva med samarbeidsavtalen som seier at alle tre partia er positive til privatskular? spurde leiar May Eva Sandvik (H).
– Samarbeidsavtalen trur eg me tar på kammerset!

Spørsmåla og svara frå Gudmund Husdal (Frp) viste litt av temperaturen då Skodvin sin utsetjingssøknad var oppe. Ønsket er å få ha Skodvin skule eitt år ekstra, slikt at elevar som vil det, kan gå direkte over i ein privat skule.

Kva med avtalen?
Både Høgre og til dels KrF gjekk i strupen på Frp som dei er i koalisjon med. May Eva Sandvik rosa engasjementet for ein privatskule på Skodvin.

– I hovudet mitt er det ikkje eitt argument for å seia nei til søknaden, sa Sandvik.

Randi Hella Træland (H) argumenterte også sterkt for foreldra sitt engasjement og søknaden om å utsetja nedlegginga av Skodvin skule eitt år. Då slepp elevar å flytta tilbake frå Lindås.
– Frp er for fridom til å velja. Då er det dårleg strategi å ikkje imøtekoma søknaden, sa Hella Træland.

– Dette er ikkje ein søknad me støttar for å få omkamp om nedlegging, presiserte Arne Ramslien (KrF).

Også han ville støtta søknaden ut frå at han sjølv og partiet er positiv til private skular.
– Eg har full tillit til foreldregruppa. Me må leggja til rette for at borna ikkje vert rivne opp med rot, sa Ramslien.

Ønskjer lukke til
Leidulv Brunborg (Ap) gjorde det klart at han støttar rådmannen, som er svært negativ til å imøtekoma Skodvin-søknaden.

– På møtet med foreldregruppa fekk eg ein direkte info om at det eigentlege motivet er å behalda Skodvin som kommunal skule, sa Brunborg.

Han gjorde det klart at Ap ut frå faglege argument ikkje er mot ein Montessoriskule, og at ein vil ønskja ei slik satsing lukke til.

Nye rundar
Avrøystinga viste fem for søknaden. Etter ein heftig debatt var det Høgre, KrF og Sp som støtta søknaden.

Frp og Ap sine tre støtta rådmannen i at søknaden må avvisast. I dag er det klart for ein ny runde, i formannskapet, før det kan verta ein ny thriller i kommunestyret i september.

Tryggleik
Foreldra til kring 90 prosent av Skodvin-borna har meldt interesse for ein privatskule.

– Når enkelte argumenterer med tryggleik som viktig argument, er også rådmannen opptatt av det. Kommunestyret gjorde eit vedtak i juni, og gjennomføringa av det er i gang. Dette vil skapa tryggleik både for elevar, foreldre og tilsette, uttalte saksbehandlar Anne Wergeland til Strilen etter behandlinga.

Ho viser og til at arbeidet med å pussa opp Lindås barneskule alt er i gang.
– Å stoppa dette arbeidet vil skapa utryggleik, seier Wergeland.