Vardebrenning fekk TV-dekning

– I Eivindvik måtte me flytta brenninga frå Tverrfjellet til Mikkelfjellet eit stykke ovanfor Gulatingsstaden. Grunnen var for mykje snø i den øvre delen av stien, opplyser Leiv Henriksbø i Nettverk mot vindmøller i Gulen.

Men flyttinga hindra ikkje at TV2 vart med og gjorde opptak av brenninga, opptak som gjekk på nyheitene same kvelden, skjærtorsdag.

Fleire aktørar

Men ikkje fleire enn ni personar var med på markeringa som fekk TV-dekning.

– Når det gjeld Nordgulen, var det betre frammøte, i og med at såpass mange som 17 personar var med her. I tillegg var det ni personar som var dårlege til beins som laga sitt eige bål nede i bygda, opplyser Henriksbø.

Situasjonen i Nordgulen er litt spesiell, i og med at det her er to vindkraftselskap som konkurrerer om omtrent det same fjellområdet (SAE-Vind og Zephyr).

Hittil har fleirtalet av grunneigarane nekta å inngå avtale med nokon av dei.

– Fortørna

– Fylkesdelplanen ser ut til å vera svært bra for resten av fylket, men me i Nettverk mot vindmøller i Gulen er svært fortørna over at kommunen vår har kome så dårleg ut i denne planen, seier Henriksbø.

– Nesten 70 prosent av Gulen skal vera eigna til vindkraftområde. Viss alle desse områda vert utbygde, skal Gulen produsera 900 MW, medan resten av fylket berre skal produsere 650 MW samla. Det vert sendt inn innspel når denne planen går ut på høyring i slutten av april, opplyser han.

Landsorganisasjonen «Stopp Rasering av Kysten» mobiliserte også i Troms, Nordland, Nord- og Sør-Trøndelag, Møre og Romsdal, Hordaland, Rogaland og Vest-Agder med protestar mot kystbaserte vindturbinar.

– Folk i kystfylka vil ha slutt på at grådige kraftselskap tar seg til rette. Kystbasert vindkraft er ein katastrofe, heiter det i ein uttale frå leiaren i organisasjonen, Hallvard Slettevoll, som vurderer markeringa som vellukka.