- Grove manglar i pleien ved Knarvik Sjukeheim

? Det er mange såkalla avviksmeldingar om at dei eldre ikkje får god nok pleie, seier Arnhild Haugland Tvete, som er lokal leiar i Norsk Sjukepleier Forbund.

Haugland Tvete viser til at avvika i stor grad oppstår kring pasientane sine rettar til å få god nok tid til å innta mat og drikke. Om ein pasient til dømes får for lite væske, kan dette i verste fall gje inntørking. Slike tilfelle vil også kunna gripast fatt i av tilsynslegen for sjukeheimen.

I brevet som er sendt til ordførar og rådmann, nemner sjukepleiarforbundet følgjande kritikkverdige tilhøve:

? Pasientar som ein ikkje har nok tid til å mata.

? Planlagde liggedagar i mangel av personale.

? Pasientar må venta til kl. 12.00 med å stå opp.

«Dette er klare brot på krava som helsepersonellova set til fagleg forsvarleg og omsorgsfull hjelp», heiter det i brevet.

Brevet viser direkte til eit oppslag i Strilen i desember der situasjonen ved Knarvik Sjukeheim vert omtalt.

Haugland Tvete peikar også på at tilhøva ved Knarvik Sjukeheim er stikk i strid med rundskriv frå Sosial- og Helsedepartementet. Kvaliteten på tenestene til pasientane er kort og godt ikkje god nok, meiner forbundet å ha dokumentert.

Over fleire månader

«At ein enkeltståande dag kan gje slike tilstandar på ein sjukeheim når sjukdom i arbeidsstokken kjem brått på, er mogleg. Men her vert det oppfatta som ein tilstand som har strekt seg over fleire månader - og som kanskje er hovudårsaka til sjukdom hjå den enkelte tilsette, skriv Haugland Tvete.

I atikkelen i Strilen i desember vert det vist til aukande sjukefråvær ved sjukeheimen og store vanskar med å ha nok fagfolk til ei kvar tid.

Avventar tal

? Etter oppslaget i Strilen er aukande sjukefråvær ved sjukeheimen tatt opp i Arbeidsmiljø-utvalet. Leiargruppa i etaten drøftar også situasjonen i morgon fredag, opplyste ordførar Tove Brandvik (Ap) i formannskapet torsdag.

Brandvik opplyste at det så langt ikkje er klar konkrete tal som viser utviklinga i sjukefråværet. Strilen har også etterlyst slike tal, og tilbakemeldinga er at dei skal vera klar i slutten av januar.

Kommunalsjef Lillian Næss Brundtland nektar ikkje for at det er snakk om svikt i tilbodet til ein del av pasientane.

? Situasjonen ved Knarvik Sjukeheim er nokså kaotisk, men me har tilsvarande signal frå andre institusjonar etter å ha strama inn bemanninga. Me vil kartleggja dette nærare, seier Brundtland.