-Livsfarleg veg på Herland

Herlandstunnelen skal stå klar på slutten av 2007. I mellomtida må ein klara seg med dagens veg over Herland, der vegen er i ferd med å gli ut på enkelte stader og der det er lange sprekker i vegdekket. På ein stad der grøftekanten har gjeve etter, har Vegvesenet sett opp ein markør. På denne vegen går det store mengder tungtransport, blant anna i gjennomsnitt rundt 20 tankbilar med drivstoff kvar dag heile året.

? Tek kaka

? Eg pendlar mellom Lindås og Kårstø. Det er mange skumle vegstrekningar, men området på Herland tek kaka. Vegen er livsfarleg, seier Leif B. Haukeland til Strilen.

Når ein møter ein stor bil, må ein svinga seg ut på kanten enten ein vil eller ei, fortel han. Det er ein fordel å kjenna til at vegkanten er svak, men det er det mange bilistar som ikkje veit dette.

? Dersom ein bil, trailer eller tankbil sklir utfor her, stoppar han ikkje før han ligg i elva, seier Haukeland. Han meiner at vegstrekninga må styrkjast og at det også må setjast opp rekkverk. Ein kan ikkje venta to år til tunnelen er klar før noko vert gjort.

? Ei statleg oppgåve

Haukeland meiner og at det er merkeleg at det lokale næringslivet og kommunen må forskottera delar av vegen her, når store delar av norsk oljeverksemd vert driven langs denne vegen. Han viser til at Stura, Kollsnes og Kårstø har doble køyrefelt til nærmaste by, utan at dei distribuerer produkta sine langs vegen. Frå Mongstad går det 20 tankbilar om dagen, i tillegg til mykje trailertransport til forsyningsbasen.

? Dette er ei soleklar statleg oppgåve. Berre i avgifter på bensin og diesel som vert frakta på denne vegstrekninga, tar staten inn enorme summar, seier Haukeland.

Han meiner dei då i alle fall må sikra vegen som desse store verdiane vert frakta på.

? Ein fokuserer veldig på sikringa når det gjeld transport sjøvegen. Men når det gjeld transporten langs vegen, aksepterer ein altså å senda bilane over ei såpass farleg vegstrekning som over Herland, seier pendlaren.

Har utvida vegen

? Vegkantane er svake på heile denne strekninga. Det er difor me har utvida vegen. Me skal halda vegen vedlike til den nye tunnelen står klar. Det er ein del av oppdraget vårt, seier Jarle Solibakke, kontraktsansvarleg for Vegvesenet i Nordhordland.

Han seier dei må gjera noko med området der vegkanten har gjeve etter, men kan ikkje seia noko om når det vil skje.

Holet der kjegla står skal ha vore der sidan førre vinter.