13-12 FOR skytebane i Haukåsen i kommunestyret

? Eg er sjokkert. Dette er ei total overkøyring av eigedomsretten, var kommentaren Strilen fekk frå grunneigar Olaf Mellingen like etter avrøystinga. Han var den einaste av grunneigarane som lytta til debatten, og den einaste som er busett på Sletta.

Slik gjekk avrøystinga
Ved avrøystinga var to grupper samla: Ap sine fem representantar og dei tre frå Høgre gjekk alle inn for framlegget til reguleringsplan, som i sin tur kan opna for oreigning dersom ikkje skyttarlaget kjem til semje med grunneigarane. Frå Frp gjekk Lena Bø Nilsen, Ruth Myking og Bodil Sjursen inn for avtalen, Ole Kristoffer Tveiten og Tore Hamre gjekk mot. I Senterpartiet som venta Ivar Soltveit den einaste for planen. I Venstre var Jan Tore Hvidsten for planen, Bjørg Murberg og Sølvi Merete Mangerøy mot.
? Det nytta ikkje å stola på det partia skriv i sine program om å verna eigedomsretten! kom det frå ein motstandar etter møtet. Han gjorde det klart at han retta kritikk mot Høgre og Frp sine representantar som støtta reguleringsplanen.

Klare frontar
I debatten viste frontane seg å vera like klare og kvasse som mellom skyttarlaget sine folk og motstandarane mot ei skytebane, som mange er redd vil øydeleggja eit mykje brukt turområde.
? Kvifor har prosessen vore så elendig frå skyttarlaget si side. Dei måtte jo lagt sin flid i å få ein god kontakt med grunneigarane, sa Grethe Lunde (KrF). Ho brukte krasse ord mot det ho såg som ei kritikkverdig saksbehandling. «Uheldige metodar frå folk i skytebaneutvalet for å få fram sitt syn. «Det var vanskeleg for enkelte å møta i utvalet på grunn av oppførselen til andre i utvalet» og «Utilbørleg behandling av grunneigarar«, var blant formuleringane Lunde brukte frå talarstolen. Ho kom også inn med eit ekstra innlegg der ho apellerte til dei som måtte vera i tvil om å gå mot planen.
Vararepresentant Berit Kvalvik (Ap) var blant dei som talte varmast for å godkjenna reguleringsplanen. Og ho gjekk sterkt til rette mot dei som kritiserte måte saka har utvikla seg på.

? Tenk på dei unge
? Påstandane om at saka er dårleg opplyst opprører meg. Dei som ville forstå saka. har forstått. Her har frontrane vore så harde at ein lett kunne las seg påverka den eine aller andre vegen av folk ein kjenner. Men me politikarar er kanskje nøydde til å ta ein del val som me ikkje har lyst å ta, sa Kvalvik.
Ho appellerte til dei som snakka varm om å gje fleire tilbod til unge og ungdom som er på skråplanet. Er me villige til å bretta opp på ermane og gjera noko for dei? Eg gjekk inn for skytebane sist og er gjer det no også, sa Berit Kvalvik.

«Stå på Olaf»
? Eg har ikkje for vane å koma med tips, var det einaste ordførar Olav Steinar Namtvedt (Sp) ville seia då Strilen etter møtet spurde om det kjem skytebane på Sletta. Som eit tilleggspunkt vedtok kommunestyret mot fem røyster at kommunen kan bidra med mekling dersom skyttarlaget og grunneigarane ikkje kjem fram til ein frivillig avtale.
? Eg ser det som heilt utelukka at det kjem skytebane i Haukåsen, var siste kommentaren Strilen fekk frå grunneigar Olaf Mellingen fekk før han reiste frå Smiths Pensjonat, der møtet vart halde. Rykte Strilen oppfanga blant folkevalde gjekk på at Mellingen som største grunneigarar har fått tilbod om 470.000 kroner for sin del av grunnen som trengst til skytebane.
? Dette er berre rykte, var det einaste Mellingen ville seia til dette.
«Stå på Olaf», var helsinga Mellingen fekk frå ein av motstandaren som hadde lytta til debatten.

Kan klaga
Fungerande rådmann Leif Taule seier onsdag at vedtaket kan klagast av ein eller fleire grunneigarar. I så fall vert det ny behandling i kommunestyret, og dermed ligg det an til ei ny jamn avrøysting der varafolk teoretisk kan vippa fleirtalet mot planen.
? I så fall vil eg tru at skyttarlaget kan klaga, men det formelle i dette kan eg ikkje uttala meg sikkert om. Men står fleirtalet fast på å godkjenna reguleringsplanen, går saka vidare til Fylkesmannen til endeleg avgjerd, seier Leif Taule.