14-åring rømde i stolen bil

Politiet fekk melding om biltjuveriet klokka 21.30. Fem minutt seinare fekk dei melding om at guten hadde køyrd utfor vegen i svingane nedanfor grendahuset på Myksvoll. Bilen låg på taket med motoren i gong, og 14-åringen stakk til skogs, opplyser politiførstebetjent Terje Hilland ved Lindås og Meland lensmannskontor.

På hyttetur
Lindås-politiet bad om hjelp frå ein hundepatrulje i Bergen, og dei fann guten klokka 22.20. Sjølve pågripinga skal ha gått relativt udramatisk føre seg, fortel Hilland.
Guten vart køyrd til lege for kontroll, sidan han hadde vore involvert i ei trafikkulukke.
14-åringen var på hyttetur på Feste med ei lita gruppe frå ein institusjon for born med åtferdsvanskar i Bergen. Bilen han stal tilhøyrde dette følgjet. Men han kom seg altså ikkje lenger enn til Myksvoll.

Stor fart
Ifølgje ein fastbuande Strilen har snakka med skal den stolne bilen ha vore observert med stor fart sørover frå Feste. Bilen vart stygt ramponert i utforkøyringa, og vitnet seier at guten har vore heldig dersom han ikkje skada seg i ulukka. Men skadane var i alle fall ikkje verre enn at han klarte å røma til skogs.