16 førelegg etter stor politiaksjon

Aksjonen var eit samarbeid mellom politiet, Trygg Trafikk, Vegvesenet og trafikkskulane, og var ein kombinasjon av kontroll og informasjonskampanje. Ti av bøtene vart skrivne ut ved Åse, to på Hjelmås og fire på Flatøy. Høgste fart vart målt til rundt 100 km/t i 80-sona ved Åse.
Ein bil vart også avskilta på grunn av dårleg teknisk stand og at bilen ikkje var framstilt for EU-kontoroll. Ein del bilførarar fekk også skriftlege pålegg for tekniske feil, fortel Vatne. Han reknar aksjonen som vellukka, og dei fekk delt ut svært mykje informasjonsmateriell også. På Åse fekk dessutan folk testa korleis det er å kollidera i 8 km/t, i installasjonen «bråstoppen». Ifølgje arrangørane set ein seg ikkje i bilsetet utan bilbelte den første tida etter den testen. Andre fekk også prøva «Velte-Petteren», som er ein kupe som kan snuast rundt. Der fekk folk oppleva korleis det kjennest når bilen veltar.