18-årig jurist arbeider for bygda

Sjur slutta i den offentlege skulen då han var 11 år. Etter det har han fått heimeundervisning av foreldra. I ein alder av 13 vart familien sitt gardsbruk skøytt over på han, og han fekk ansvar for rekneskapen. Då han var 14 byrja han på gymnaset som privatist, og gjorde tre års skulegang unna på nærare to år.
? Etter gymnaset har han tatt fleire realfag, samt tatt juridisk embetseksamen, seier systera Signhild.
Av realfag har han 90 studiepoeng i basisfag og 90 i valfag. På to år har han gjort unna arbeid som normalt tar 9 1/5 år.

 Vanskelege fag
? Eg les kanskje ein time eller to kvar dag, så eg har ikkje studert så veldig hardt, seier Sjur Dyrkolbotn beskjedent.
Dei vanskelegaste faga Sjur har lese, er realfaga. Det krev meir enn å berre lesa pensum. Ein må rekna oppgåver og helst følgja førelesingane.
? Matematikkfaga er ikkje til å spøka med. Kalkulus og algebra er fæle ting. Det kan vera ganske morosamt når ein set seg inn i det, men det er skummelt å gå opp til eksamen når ein berre har skumlest pensum, seier Sjur.
Han innrømmer at karakterane kanskje er litt under middels i desse faga.
? At eg er så utålmodig har også sine negative sider.

Populær
Laurdag var Sjur på møte om ein ny Aksjon Bygde-Noreg. Der var det journalistane som vart utålmodige. Når Sjur først stilte opp til intervju, var det mange som nytta høvet til å få ein prat med den intelligente 18-åringen.
? Sjur likar seg ikkje så godt i rampelyset, og har tidlegare takka nei til fleire aviser, mellom anna Aftenposten, seier syster Signhild Dyrkolbotn.
Då han laurdag sa ja til å stilla til intervju, var det i samanheng med Aksjon Bygde-Noreg.
Ikkje for å snakka om seg sjølv og den superkjappe utdanninga si.
? Eg er ikkje noko interessert i personlig eksponering. Det som er interessant, er om ein kan setja søkelyset på litt andre saker utanom det personlege. Sidan eg kjem frå Dyrkolbotn, er det naturleg for meg å kjempa for bygda. I tillegg har eg litt å seia om kvalitetsreforma ved Universtiteta, seier Sjur.
Å få til eit engasjement rundt bygdesaka er vanskeleg, men også viktig meiner 18-åringen. Han vil har fridom til å velja kvar han sjølv skal bu, men slik det er i dag, ser det ut til at han vert nøydd til å flytta vekk for å kunna studera og arbeida.
? Eg måtte ta juristutdanninga no, fordi kvalitetsreformen ville gjort det umogleg for meg gjere utdanninga unna på min eigen måte. Eg måtte setja i gong fort, før alt vart obligatorisk, seier Sjur.
Han ser på kvalitetsreformen meir som ein kontrollreform.
Draumen hans er at ein skal stå friare i vala ein gjer. Om ein har lyst å bu i Dyrkolbotn medan ein studerar og etterpå, så skal ein ha høve til det.

Mange alternativ
Dei organiserte fritidstilboda i Dyrkolbotn er det dårleg med, men Sjur likar å ta bruk av naturen til å gå på turar, eller på ski.
? Men eg er kanskje litt for glad i sofaen og fjernsynet, smilar han.
Akkurat som dei fleste ungdommar. Men dei aller færraste 18-åringar tenkjer på kva dei vil forska på til doktorgraden sin.
? No framover har eg eigentleg fleire alternativ. Eg kan vurdera å byrja som advokatfullmektig, eller halda fram med å ta litt fleire realfag. Eg kan også ta opp att sisteavdeling på jus, ettersom eg berre fekk D. Og eg vil tenkja litt på doktorgraden.
Først på lista til 18-åringen står oppkøyringa. Det skulle ikkje ta alt for lang tid for den utålmodige studenten.
? Eg må berre ta teoriprøven først.