20 kroner i bompengar på Nordhordlandsbrua

I planane som Regionrådet Nordhordland IKS skal handsama fredag er det lagt opp til berre ein bom i Nordhordlandspakken. I ulike kommunestyre i Nordhordland har det kome opp forslag om fleire bomstasjonar, men dette er etter ei vurdering lagt vekk.
? Ei rekkje alternative lokaliseringar er ikkje aktuelle på grunn av for lågt trafikkgrunnlag. Bompengeinntekta vil knapt dekkja innkrevjingskostnadene, heiter det i saksutgreiinga til Regionrådet.
? Ein bomstasjon ved brua er ei effektiv løysing med særs låge innkrevjingskostnader, heiter det vidare.

12 kroner med rabatt
På Nordhordlandsbrua var taksten for personbil 45 kroner, med klippekort på 40 turar for 1080 kroner var prisen 27 kroner per passering.
I det nye bompengeopplegget er det lagt opp til ein takst på 20 kroner for personbilar. Med rabatt vert taksten 12 kroner. Som tidlegare skal det vera bompengar i begge retningar over brua, og ikkje berre i ein retning slik ein til dømes har det for bompengane til Askøybrua.

Bompengar frå 2009
I saksutgreiinga er det lagt opp til at ein skal starta innkrevjinga frå 1. januar 2009. Nedbetalingstida for fase 1 av Nordhordlandspakken vert ni år, dersom trafikken vert som venta.
Med ein bomstasjon ved Nordhordlandsbrua vil ein fanga opp alle reiser mellom Knarvik og Bergen. I saksutgreiinga heiter det at trafikken forgreinar seg ut til den enkelte kommune i rimeleg samsvar med fordelinga av investeringane.
? Unntaket er Radøy, som får ein relativt stor del av bompengetilskotet. Sjølv om dette ikkje er heilt i tråd med nytteprinsippet, vil Regionrådet tilrå at regionen stiller seg solidarisk i høve til dette. Ein viser til den historiske utviklinga der regionen har stått samla bak ei rekkje tyngre investeringar i ulike delar av Nordhordland. Trafikken i snittet mellom Bergen og Nordhordland har
vore med på å finansiera store prosjekt som Krossnesbrua i Meland og Hagelsundbrua i Meland/Lindås, heiter det i sakspapira.

Nyborgtunnelen i fase 2
Første fase av Nordhordlandspakken omfattar ikkje det største prosjektet i pakken, Nyborgtunnelen. Tunnelen mellom Klauvaneset og Åsane kjem først i andre fase av pakken, saman med veg frå Marås til Manger på Radøy, ny veg forbi Knarvik og vegsamband som skal knyta saman Odland og Landsvik i Meland.

Meir om Nordhordlandspakken i Strilen torsdag 4. mai.