2000 jubla for kongestatuen

? Eg anar ikkje kor mykje folk det er her. Det er i alle fall godt over tusen, sikkert over to tusen menneske, seier Ola Braanaas til Strilen kort tid etteravdukinga av kongestatuen. Både kunstnar Knut Steen og den nye eigaren av kongestatuen var rørt over at eit hav av vestlendingar trassa styggeveret. Stemninga var god. Knut Steen og artist Nora Brockstedt vart klappa fram av eit entusiastisk publikum.
?Knut, Knut, Knut! hylte folkemengda i det kunstnaren bana seg veg fram til scena og amfiet ved statuen. Då alle omsider var kome på plass var det klart for nedteljing frå fem, før seksten utvalde representantar for folket fekk dra i snorene og avduka statuen. På tredje forsøk rivna presseninga og Kongen kunne skoda ut over havet til ellevill jubel frå folkemengda.
? Eg er ikkje i tvil om at Kongen er komen på riktig plass, sa ein rørt kunstnar og hausta stor applaus.
Sjølv vêrgudane såg ut til å verta i godlag. Regnskyene tok ein liten pustepause medan publikum sette kursen mot matbuer, gjøgleri og underhaldning på øya. Utover ettermiddagen og kvelden var eit stort utval artistar i aksjon på scena. Publikum fekk oppleva både Oddvar Torsheim, Transjoik, Kasterosa, Odd Børretzen, Nora Brockstedt og fleire til.