5000 i bot til aksjonistar

Protest mot gasskraft
Aksjonistane protesterte mot at anlegget vert bygt utan at det vert CO2-handtering frå første dag.
? Dersom Jens Stoltenberg sin måte å kutta klimagassutslepp på er å gje løyve til store utslepp og utsetja nødvendig CO2-reinsing i mange år, vil det verta vanskeleg å nå målet om 30 prosent reduksjon i utsleppa innan 2020, uttalar Lene Liebe, nestleiar i Natur og Ungdom i ei melding.
Ho er ein av aksjonistane som møtte i retten.
Det var totalt 33 aksjonistar som deltok, og desse vart av politiet pålagde å betala 7000 kroner kvar i bøter. Eit par av aksjonistane vedtok bota, medan nokre meinte bota var for høg og andre nekta å betala. For dei to siste gruppene kom saka opp i retten.  Det var dei som nekta å betala som fekk saka si behandla i denne omgang, men dei nådde ikkje fram på annan måte enn at bota vart sett ned med 2.000 kroner.

Fryktar utsetjing
? Me er sjølvsagt glade for at bota vart sett ned. Klimaendringane er farlege, urettferdige og alt i gong, så me kan ikkje godta så store klimautslepp som gasskraftverket på Mongstad vil medføra. Me vil halda fram arbeidet for reinsing på norske gasskraftverk, uttalar Liebe i meldinga.
Natur og Ungdom meiner utsleppa kunna ha vore reinsa lenge før 2014, som er året då det skal vera full CO2-handtering ved anlegget. Natur og Ungdom fryktar og nye utsetjingar av reinsinga, fordi den endelege avgjerda om bygging av CO2-anlegget ligg svært langt fram i tid.