6000 har sett Which Witch

? Det er plass til 1100 menneske på kvar framsyning. Alle bilettane til premieren var utselt. Det same gjeld framsyninga no på fredag. Til no har vel 4000 menneske sett oppsettinga, seier pressekontakt Rune Rydland.
Etter to dagar med kvile er Which Witch gjengen på Seim igjen klar for å entra scena. Det er framleis seks framsyningar att før det heile er over søndag kveld.
Både onsdag og torsdag var det kring 1000 på tribunane, og til framsyninga fredag kveld er det ikkje billettar å oppdriva.

Slepp omkjøring
Etter å ha vore i kontakt med Vegvesenet kan Rune Rydland også lova publikum at dei slepp omkjøring på strekninga mellom Åse og Herland sjølv om det går føre seg vegarbeid på nattestid på denne strekninga.
? Me har fått lovnad om at vegen ikkje skal stengjast før ti om kvelden, når me har framsyning. Vegen vert også open ei lita stund etter at framsyninga er slutt, slik at folk kjem seg heim igjen, seier han.

Sel mat
Dugnadsgjengen bak Which Witch nyttar også sjansen til å opplysa om at det vert selt mat frå bodar på Håkonshaugen både før framsyninga startar og i pausen. ? Me sel både kaffi, sjokolade, lappar, brus og pølser, seier Hege Ramsdal i dugnadsgjengen. Inntekta frå salet går til lag og organisasjonar som jobbar dugnad for Which Witch.
 ? Det er ikkje så mange som er klar over at det vert selt mat her. Det er litt synd fordi inntektene for sal av mat, er den einaste løna dei laga som har jobba dugnad får, seier ho og fortel at det er over femti frivillige som jobbar dugnad ved kvar einaste framsyning.
 ? Det er veldig kjekt og me trivst bra. Me er veldig takksame dersom folk vil støtta laga våre som takk for strevet, seier ho. Dei frivillige kjem mellom anna frå Seim Songkor, Seim musikklag, mållaget og 4H grupper i bygda.