? Betre ver gjev meir trafikk

? Det har vore langt betre ver i haust enn i fjor, seier matrosane Bjarte Hjelmtveit og Rune Strømsnes som forklaring på den sterke passasjerauken.
Dei to har også notert seg stor kursaktivitet ved Fedje Treningssenter, noko dei tippar også slår ut i trafikken.
? Elles har den fine sommaren gjort at Fedje har hatt mange dags- og helgeturistar. Ein del vil ha med seg Nordsjøløypa, seier dei to.

Stengt servering
Men Strømsnes synest det er på sin plass med litt kritikk av dei to stadene på Fedje som har servering.
? Dei er ikkje flinke nok til å ha ope når besøkjande har behov for mat. Det får me på ferja ofte høyra,  seier Strømsnes.
Blant dei faste passasjerane på Fedje-ferja er Jorunn Kårdal, som jobbar tre dagar i veka på Fedje. I ruskeveret torsdag hadde ferja tatt ho trygt tilbake til Sævrøy.
? Det er greitt å reisa med ferja. Alternativa er jo få! seier Kårdal.
Passasjertrafikken til Fedje gjekk opp med heile 21,5 prosent i september samanlikna med 2005.

8.700 personar
I alt reiste akkurat 8.700 personar med M//F Fedjefjord i år. Vermessig var september i år langt betre enn i fjor, så det kan ha litt utslag på trafikken.
Også talet på bilar gjekk kraftig opp i september. 3.267 reiste med Fedje-ferja i september i år, mot 2.859 i fjor. Det er ein auke på 14,3 prosent.

Opp i Fensfjorden
Sambanda i Fensfjorden hadde også ein ganske stor auke i september.
Talet på bilar gjekk opp med sju prosent samanlikna med i fjor. Totalt vart det frakta 13.271 bilar.
Når det gjeld passasjerar, er auken på 9,9 prosent til 25.299 personar. Det er særleg sambandet Leirvåg - Skipavik som trekkjer tala opp.
Kanskje er det hyttefolka som gjer utslaget?