? Dumt å mangla lærebøker

? Me har ikkje tilgang til internett heime, så korleis skal me kunna bruka det då? undrar Kim André Vangberg og Lene Mari Soltveit på vg1 Helse og Sosialfag ved Knarvik vidaregåande. Dei meiner at trass i innføring av ny reform burde det ikkje vera vanskeleg å ha bøkene klare til skulestart.
? Kor mange datamaskiner skulen har disponibelt til oss og om det vert i friminuttane eller etter skuletid me i så fall må bruka dei, veit me ikkje. Men for oss vert det veldig klønete å ikkje ha lærebøker uansett. Og det vert det sikkert for lærarane også, seier dei to.

Nynorsk bakerst
Så langt veit Kim André og Lene Mari at dei manglar arbeidsbøker i naturfag og sosialfag, men det er mange som har det verre. Og det er spesielt dei som vil ha bøkene på nynorsk.
Dei stiller, ifølgje Tor Modahl ved bokhandelen Nordhordland Libris, lengst bak i køen.
?  Så lenge det berre er seks prosent av elevane i landet som har nynorsk, går bokmålsbøkene i trykken først. Slik er det berre, seier Modahl.
Han stadfestar at mange av fagbøkene ikkje er ferdig trykte enno og at dei siste kanskje ikkje er på plass før i oktober på grunn av kø ved trykkeria.
Blant dei bøkene han meiner kjem sist, er ei arbeidsbok i naturfag. Men her har forlaget Aschehoug lånt ut websida si slik at elevane kan jobba på internett, fortel han.

Inga krise
At alle lærebøkene ikkje er på plass ved skulestart synest ikkje rektor på Knarvik vidaregåande, Inge Alver, er noko problem i dag.
? Då var det verre då Reform 94 vart innført og lærebøkene var det einaste hjelpemiddelet som fanst, seier han.
Han fortel at ein del av Kunnskapsløftet er at data og internett på sikt skal integrerast i alle fag, og at det er like godt å begynna med ein gong.
? Det vil alltid vera ein diskusjon kring det at ikkje alle har tilgang til internett heime. Men det trur eg vil løysa seg på sikt når skulen får fleire maskiner og me finn eit system i bruken av dei. Det er i alle fall slutt på den tida at leksa til i morgon er frå side 32 til 38 i læreboka, seier rektoren. Han fortel at Kunnskapsløftet også går ut på å bruka kjennskapen lærarane har til næringsliv og aktivitetar i lokalsamfunnet. Dessutan har lærarane etter kvart opparbeidd ein solid databank med oppgåver og aktivitetar som enkelt kan nyttast no når lærebøkene kjem litt seint, seier Inge Alver.