? Matre ligg midt i verda!

Oppedal kjem frå Bergen, men flytta til Matre då han fekk jobb på Havforskingsstasjonen.
Og ein fekk verkeleg eit inntrykk av at dette er ein av dei aller mest moderne forskingsstasjonane i verda på sitt felt tysdag. Det kom 135 gjestar frå inn og utland for å markera opninga av den nye stasjonen til 177 millionar kroner.

Internasjonalt miljø
Dei var der alle ? folk frå ei mengde med direktorat, institutt, departement, konsulentar og utdanningsinstitusjonar. Namn som Mr. Mario Lopez dos Santos frå EU vitna om at dette ikkje berre var ein norsk storhending, men ei hending som også vart lagt merke til utanfor landets grenser.
? Me har hatt gjestar og stipendiatar frå utlandet her på Matre i ei årrekke, seier stasjonsleiar Øivind Torslett ved Havforskingsstasjonen.
Desse har kome mellom anna frå land som Canada, Sør-Afrika og Thailand. Han fortel at mange av utlendingane som kjem på besøk reagerer på dei høge fjella og fjordane.
Men mest av alt er dei imponerte av det verktyet for forsking som havforskingsstasjonen er. Etter at den nye stasjonen no er på plass, vert dette verktyet blant dei aller beste i verda.

? Ein viktig dag

Hovudgjesten under opninga var fiskeri- og kystminister Helga Pedersen.
? Dette er ein viktig dag for oss alle. Me har nådd eit viktig mål. Men vegen vidare er ikkje mindre spanande, sa statsråden i talen sin. Pedersen lova å følgja godt med på utviklinga ved Havforskingsstasjonen.
Ho viste til at produksjonen av laks og aure i Noreg i dag er 6000 gonger større enn då havforskingsstasjonen på Matre så smått starta i 1971.
Pedersen meinte at forskinga kan vera med på å løysa dei utfordringane som både næringa og forvaltninga slit med. Mellom utfordringane er å få ned dei høge rømmingstala frå oppdretta og kampen mot parasittar på fisken.
? Forbrukarar i alle marknader er opptekne av fiskehelse og fiskevelferd. Utan at me har ei forskingsbasert forvaltning av næringa, vil det gå dårleg, sa statsråden.
Ho understreka elles at det er viktig å gjera folk flest merksame på den høge kompetansen som finst i heile næringa. Ho meinte at kunnskapen til folk om næringa, bør verta betre, og oppmoda difor Havforskingsinstituttet til å halda fram med informasjonsarbeidet sitt.