? Meir gass til Mongstad

No må distriktet kjempa for at det vert lagt eit tolv tommars gassrøyr til Mongstad, ikkje eit titommars. Det kan få mykje å seia for utviklinga, meiner Svein M. Nord-vik i NHIL.
? Eit tolvtommars røyr vil ha 50 prosent større kapasitet enn eit røyr på ti tommar, seier dagleg leiar Svein M. Nordvik i Nordhordland Hand-verk- og Industrilag (NHIL).
Det kan få stor innverknad på utviklinga i distriktet om røyret som skal byggjast frå Kollsnes til Mongstad, vert ti eller tolv tommar.
I planane som Statoil jobbar ut frå no, er det meininga å leggja ein gassleidning på ti tommar, men Noregs vassdrags- og energidirektorat (NVE) sin konsesjon opnar for leidning inntil tolv tommar.

Liten kostnadsauke
Som ei symbolsk understreking av kor viktig storleiken på gassrøyret er, overleverte Nordvik i går ein liten stump leidning på tolv tommar til Regionrådet. Han håpa dei kunne vera med på å danna det politiske presset for å overtyda utbyggjar om å velja det største alternativet.
? Der er utrekningar som viser at kostnaden berre vil auka med 8-10 prosent, altså 80-100 millionar kroner, sa han.
Og Lindås-ordførar Tove Linnea Brandvik, som, har leia regionen sitt arbeid mot regjeringa for å få eit gasskraftverk til Mongstad, lova at ein også skal driva påtrykk for å få den største gassleidningen.

Råstoff og
Nordvik understrekar at naturgass er meir enn energi. Det kan vera råstoff og for ulike industriprodukt. Viss regionen får rikeleg tilgang på naturgass, kan dette difor vera utgangspunkt for ny verksemd, og dermed nye arbeidsplassar i regionen.

Nordover
Vidare meiner Nordvik det er viktig å få ein tolvtommars leidning fordi dette kan gje gass til Sogn og Fjordane.
Det føreligg alt planar om å byggja ei avgreining av gassleidningen til Sløvåg i Gulen, men også på Luteland i Fjaler er der prosjekt som er avhengig av gassleidning.
? Å kjempa for ein tolvtommarsleidning til Mongstad må vera den nye, store kampsaka no når gasskraftverket er på plass, konkluderer Nordvik.