? Rart vedtak mot vindmøller

? Eg vil ikkje kjempa for nokon vindmøllepark, men dette var eit litt underleg vedtak, sa Mjøs etter møtet.
Han hadde då lytta til debatten, som enda med at fleirtalet på 16 støtta eit utsetjingsframlegg frå Venstre. Først når staten kjem med ein nasjonal plan for vindkraft, vil Radøy ta stode til søknaden om oppstart av reguleringsplan frå selskapet Gefion, heiter det i vedtaket.
Dei som sa nei til reguleringsplan i denne omgang, var alle sju i Sp, alle tre i Høgre, KrF-gruppa på to, Venstre sine tre pluss Berit Kvalvik frå Ap. Heile Frp pluss fire i Ap ville ha ein reguleringsplan.

Ville hatt plan
? Eg er ikkje blant dei mest skeptiske grunneigarane. Og eg har ikkje vore med på noko protestskriv til kommunen, sa Mjøs til Strilen.
Han gjorde det klart at han godt kunne tenkt seg utarbeiding av ein reguleringsplan som ville belysa prosjektet i full breidde.
Mjøs har likevel reagert på at Gefion har fått ei tilslutning frå grunneigarane som er brukt til å gå vidare med saka.
? Denne tilslutninga er i sin tur nytta til ei førehandsmelding til NVE. Grunneigarar som framstiller dette som ein søknad om konsesjon, slik Strilen skreiv torsdag, tek feil, seier Mjøs.
Etter det Mjøs har kjennskap til, er det ikkje snakk om å utarbeida ein nasjonal plan for vindkraft som Radøy-politikarane etterlyser. Mjøs viser og til at regjeringa etter Soria Moria-erklæringa stiller seg positiv til meir vindkraftutbygging her i landet

Minst konfliktfylt
Rådmannen meiner ein vindpark på Mjøs kan vera positiv for aktiviteten i bygda. Det kan og gje grunneigarane inntekter og gje Radøy ei utnytting av ei fornybar energikjelde.
Førebels vurderingar i administrasjonen ser området på Mjøs som det minst konfliktfylte i kommunen.
Heile hovudutvalet for plan, landbruk og teknisk støtta tilrådinga frå rådmannen om å opna for ein reguleringsplan.

? For fort fram
Men i kommunestyret var stemninga annleis. Eit nyleg NRK-program hadde fått fart på Vigdis Villanger (Sp) si interesse for å vita meir om vindmøller. TV-programmet hadde også gjort ho meir skeptisk.
? Vindmøller er noko nytt på Radøy, og i denne saka går me for fort fram. Kvifor har NVE berre føretatt vindmålingar langs kysten? Det bles vel også i Jotunheimen og Rondane? Først vert fossane langs kysten lagt i røyr, og no skal også kystlinja vår takast til vindmøller, sa Villanger.

Utslepp og kraftline
Ho etterlyste ein nasjonal plan for vindkraft og langt grundigare debatt før ho ville opna for ein reguleringsplan på Mjøs. Som grunneigar på Villanger vil ho ha avklart om ho var ugild, men det kunne verken ordførar Olav Steinar Namtvedt (Sp) eller andre i kommunestyret sjå.
? Radøy er også råka av utslepp frå Sture og Mongstad, inkludert eit komande gasskraftverk. Me skal og ha ei kraftlinje over Radøy. Og det er heilt andre styresmakter enn oss som avgjer om den kjem i jord eller lufspenn, sa Vigdis Villanger.
Ho var skeptisk til at kommunen i tillegg må ofra plass for vindmøller.

Kven som helst
Etter møtet seier ordførar Namtvedt at kven som helst, i teorien, kan få utarbeidd ein reguleringsplan sjølv om kommunestyret seier nei til oppstart.
? Men i eit slikt tilfelle har ein ingen garanti for å få planen godkjend, seier Namtvedt.