– Alle tener på at Knarvik får veksa

– Knarvik kan gjerne få så høge bygg at dei visest frå Bergen! spissformulerer alltid engasjerte Asbjørn Algerøy, dagleg leiar i Business Region Bergen.

Det litt meir formelle svaret er at kor mange etasjar som skal tillatast i Knarvik, vert det Lindås kommune sin jobb å avgjera. Også regionrådsleiar og Radøy-ordførar Jon Askeland, som tok mot rapporten torsdag, overlet til Lindås-politikarane å utforma Knarvik i åra framover.

Samstundes utfordrar Algerøy og Askeland alle kommunane rundt Bergen til å få på plass nye næringsareal. Regionsentera må sata på fleire kompetansearbeidsplassar.

– Samstundes må Lindås og Austrheim få ros for å setja av rikeleg med nytt industriareal rundt Mongstad, seier Algerøy.

86.000 nye jobbar
Rapporten sine ønskje er og klare når det gjeld  tettare samband på Vestlandet:

– Me vil ha på plass blant anna ferjefritt samband Bergen-Stavanger og få utgreidd intercitytog på same strekning, opplyste Algerøy.

Han sette fokus på at all utvikling ikkje kan skje i Bergen.

– Satsar heile regionen rett, kan det koma 110.000 nye innbyggjarar fram til 2030. Då trengst det og 86.000 nye jobbar og mange nye bustader, er Algerøy og Business Region Bergen sin visjon.

Den nye rapporten er ei samla ønskjeliste for næringsutvikling i heile Business Region Bergen. Der er Nordhordland med, og som nyvald leiar klappar Jon Askeland for vyene om fleire spennande jobbar i senterområdet Knarvik.

– Sats gjerne også på «Kystbyar» med konsentrerte bustader ikkje så langt frå Knarvik. Radøysundet bør ha fleire stader som eignar seg. Manger må og få tettare  bustadutbygging, ivrar Askeland.

Olje, vatn og vind
Næringane som rapporten prioriterer høgast er oljeverksemda, vasskraft, vindkraft, fjernvarme, maritime og marin næringar samt media/kultur og reiseliv/opplevingar.

– Eg ser rapporten som ei tung satsing på Mongstad. Dette er ein god dag for regionen, med denne rapporten i tillegg til storgevinst til Austrheim i Viking-Lotto og berginga av snøggbåten! seier Askeland.

Han støttar Algerøy si satsing på «knutepunkt»-alternativet. Det legg opp til vekst kring Bergen sentrum, bydelssentra og lokalsentra i Bergen, samt Knarvik-Frekhaug, Straume med «Sotra Kystby», Kleppestø og Osøyro.

Målet er at 80-90 prosent av veksten i arbeidsplassar, skal koma i desse områda. Resten skal koma i «ytre område», der blant anna Mongstad, Kollsnes, Ågotnes og Leirvik inngår.