Alvorleg skadd av ku

Mannen gjekk ein tur med hunden sin på kvelden, og vart meldt sakna då han ikkje kom tilbake og dei pårørande ikkje kunne finna han, opplyser politiførstebetjent Harald Romarheim ved Lindås og Meland lensmannskontor. Det vart starta ein leiteaksjon, der dei og hadde med seg ein politihund. Dei fann mannen i eitt-tida om natta.

Sendt til sjukehus
? Mannen hadde vorte stanga ein del gongar. Han vart skadd i ryggen og kom seg ikkje derifrå. Han vart sendt til sjukehus med ambulanse, seier Romarheim.
På kveldsturen hadde mannen kome inn på eit beiteområde, der det gjekk ei ku med kalv.
Frå Haukeland Universitetssjukehus får Strilen opplyst fredag klokka 10.30 at tilstanden til mannen er alvorleg, men stabil. Han har fått ryggskader, og skal opererast.

Uvanleg hending
Det er sjeldan kyr går til åtak på menneske, seier veterinær Trond Henriksen ved Mattilsynet i Nordhordland.
? Men dersom ei ku med kalv føler at kalven er truga, er morsinstinktet veldig sterkt, og ho vil verna kalven, seier Henriksen.
I løpet av mange år som praktiserande veterinær har han opplevd to gongar å verta angripen av kyr. Den eine gongen vart han pressa oppetter ein vegg av ei ku med horn. Han tok tak i horna og fekk etter kvart hjelp av bonden til å jaga kua vekk. Også den kua hadde kalv.
? Det er ikkje alltid godt å seia korleis dyr tenkjer og reagerer, og ein bør difor aldri stola heilt på dei, seier Henriksen.
Det hender oftare at kyr jagar hundar som kjem inn på beitet. Når det gjeld å gå til åtak på menneske, er det meir vanleg at oksar gjer dette enn kyr, fortel han.