Åmdal Sandvik vraka med knapp margin

? Det er vel rett å seia at Solbjørg var skuffa, men det må ho helst svara på sjølv, seier leiaren i Meland Høgre, Ragnar Bratland, etter kampvoteringa.
Bratland seier at han beklagar at partiet skulle koma opp i denne situasjonen. Eit frammøte på 23 på nominasjonsmøtet er meir enn vanleg, og Bratland seier at det unekteleg viser at det har vore mobilisering.
Møtet måndag avgjorde dei to øvste plassane på lista. Eit nytt møte i februar vil setja opp lista vidare frå nummer tre.

? Uheldig og kjedeleg
? Dette har vore både uheldig og kjedeleg for partiet. For Solbjørg sin del var det høgst ufortent at det skulle enda med ein open strid. Men ho har sjølv vald den situasjonen og ikkje tatt signala frå ein samrøystes nominasjonskomité, meiner Bratland.
Nominasjonskomiteen med Jorunn Brakstad, Terje Larsen, Steinar Erstad og Torbjørg Bergersen hadde samrøystes gått inn for Aadland som 1. kandidat og Elna Bjørndal som nummer to.
? Eg hadde håpa at Åmdal Sandvik kunne gå av etter åtte år som ordførar med talar og applaus. Difor er eg svært lei meg for at ho valde kamp, seier Bratland.
? Men Åmdal Sandvik hadde tydelegvis ei nokså brei støtte i og med at ho berre tapte med ei røyst?
? Det kan du seia, men avrøystinga viser at det i stor grad er dei mest aktive i partiet, i styret og kommunestyregruppa, som har ønskt ein ny toppkandidat, seier Bratland.
Strilen lukkast tysdag føremiddag ikkje i å få tak i Nils Marton Aadland.

Reagerer på mistillit
? Nominasjonsmøtet var reelt og greitt, men eg var skuffa over den massive mistilliten som Ragnar Bratland uttrykte, som leiar i Meland Høgre. Han hadde ein tale som berre kunne oppfattast som ein veldig klar mistillit til meg som sitjande ordførar. Det synest eg var trist, og det var fleire enn meg som reagerte på det, seier Åmdal Sandvik.
Ho er usikker på kor gunstig det er for partiet at Nils Marton Aadland som fylkesleiar stillte opp som motkandidat med bakgrunn i den klare kritikken av henne som sitjande ordførar.
Åmdal Sandvik viser også til at nestleiaren i Meland Høgre, Johan A. Andersen, saman med Simon Simonsen, som køyrde fram hennar kandidatur.
? Sjølv er eg overraska over at utfallet vart så jamnt.
? Fellte du ei tåre etter å ha vorte vraka?
? Nei, overhovudet ikkje! Det er det ikkje verdt.
? Kjem du til å gå tilbake til læraryrket?
? Eg har jo permisjon frå ei stilling som lærar, men no konsentrerer eg meg mest om jobben som ordførar i Meland enno eit år. Akkurat no er eg i Oslo i samband med utdelinga av statens tiltakspris for bustadslause. Der er Meland ein av fire nominerte, seier Åmdal Sandvik til Strilen tysdag føremiddag.