Anleggsstart i Romarheimsdalen

Første arbeidsdagen i det nye året var folk frå Mesta på plass i Romarheimsdalen. Arbeidet med ny veg og tunnel mellom Gamlesetra og Nipetjørn er i gang.

? Me startar arbeidet på skjeringa som skal koma nordom Gamlesetra, fortel byggeleiar Arne B. Strand i Mesta til Strilen.

I første omgang er det berre fire mann i arbeid med ei gravemaskin og ein borerigg, men aktiviteten vil auka kraftig framover vinteren. I begynnelsen av mars skal anleggsarbeidet vera i gang for fullt.

Så langt er det ikkje mykje trafikantane merkar til anleggsarbeidet. Ein har alt flytta kraftlina, og no skal ein laga anleggsveg opp til der sprenginga av vegskjeringa skal begynna. Ein skal også fylla ut noverande veg noko, slik at  det skal verta lettare å passera. Men Strand seier at bilistane nok må belaga seg på litt venting og fartsavgrensingar når arbeidet er i gang for fullt. Det vil koma opp skilt om dette.

Totalt er anlegget i Romarheimsdalen kostnadsrekna til 230 millionar kroner. Av dette har Mesta kontrakt på 148 millionar kroner. I tillegg kjem planlegging, prosjektering og alt som har med det tekniske, som lys og kommunikasjon, i den 940 meter lange tunnelen som skal byggjast.

Samla skal det byggjast 7200 meter hovudveg, 500 meter lokalveg og 1000 meter jordbruksveg og avkøyrsler. Fire bruer og to rasoverbygg/portalar er også med.

Alt dette skal stå klart til bruk 1. september 2008. Då er det nok mange trailersjåførar og andre som pustar letta ut.