Årets beste handledag

– Tysdag denne veka var det 10.000 kundar innom Knarvik Senter, etter eit snitt dei siste vekene på 8-9.000. Flest kundar ventar me no torsdag før jul, seier Åge Torsvik, som er senterleiar for Knarvik Senter.

Senterleiaren har ikkje fått inn omsetnadstala for alle butikkane, men dei tala han har, viser at julehandelen er god.

– Det ser ut for at handelen er på veg opp, etter ein litt treg start. Denne førjulsveka får me ein handledag meir enn i fjor, og det gjer at julehandelen nok kjem opp i same tal som i 2010, eller litt over.

Bra for Jernia
Heilt rett samanlikning vert det ikkje, sidan butikkutvalet ikkje er heilt det same som i 2010. Ein av dei nye er Jernia, som opna på tampen av november.

– Jernia melder om god handel, og av dei andre har mellom anna Safari meldt om god utvikling dei siste vekene, seier Torsvik.

Særleg bra er salet av gåvekort, dette har auka mykje samanlikna med tidlegare år. No har senteret også fått på plass ein automat der ein kan kjøpa gåvekort innanfor heile opningstida til senteret, og ikkje berre når senterkontoret er ope.

– For dei som ikkje veit kva dei skal kjøpa, er gåvekort eit godt alternativ.

Brannalarm
Laurdag fekk senteret ei «brannøving» midt i opningstida, etter at røyk frå ein av butikkane kom ut i fellesarealet, og sette i gang alarmanlegget.

– Røyken var reell nok, og alarmen viser at anlegget fungerer, seier Torsvik.

Utfordringa var å få tilbakestilt alarmanlegget, det kunne gjerast først når all røyken var lufta ut, og ingen røykvarslarar registrerte røyk.

– Dei fleste kundane tok det med godt humør. Oppfordringa vår til publikum er at når det går brannalarm som dette, må alle reagera og gå ut av senteret, seier Åge Torsvik.