Asfalt i Gulen, Lindås, Radøy og kanskje Meland

Kommunane som er sikrast på å få ny asfalt, er Gulen, Lindås og Radøy.
Hordaland fylkeskommune vil dobla fornyinga av vegdekke i år. I fjor vart det lagt 43,5 kilometer nytt dekke. I år er planen å leggja over 100 kilometer. Nær seks prosent av fylkesvegane i Hordaland skal få nytt dekke i år.
Men kva som vert lagt, kjem litt an på kva prisar vegvesenet får inn. Eit tydeleg døme på det er det einaste prosjektet på lista i Meland, 3,3 kilometer mellom Meland og Sætre. «Kan utgå», står det kort og godt på vegvesenet si liste over prosjekt.
Litt betre ser det ut for Lindås. Her skal det koma nytt dekke på vel ein kilometer mellom Vågseidet og Sævråsvåg. Aksjonen for å få asfalt mellom Seim og Festo gav litt utteljing i fjor. I år vert ei ny strekning på 1,5 kilometer tatt. På strekninga Høyland-Haug vert det ein del flikking, med 700 meter nytt dekke.
Dei som bur på Sletta kan sjå fram til i alt to kilometer nytt dekke - alt på fylkesvegar.
Gulen kan også sjå fram til nyasfaltering, her av midlar frå Sogn og fjordane fylkeskommune. Største innsatsen kjem på Takle-Leversund, med seks kilometer nytt dekke. På Brekke-Hjartholm vert det litt flikking.
I samband med nyasfaltering vil også stikkrenner, kantar og murar vert reparert. Grøftereinsk vert det også der dette er nødvendig.