Augeplager i Sløvåg

– Me har registrert at ein del av dei som arbeider nær kaien i Sløvåg, har fått dårlegare tårefilm enn det som er normalt. Men me veit ikkje årsaka, seier Bjørg Eli Hollund ved Yrkesmedisinsk avdeling ved Haukeland universitetssjukehus til Strilen.

Tårefilm er det som vernar auga mot uttørking. Plagene vert ikkje vurdert som alvorlege, men dei kan vera ubehaglege.

Opplysingane kjem fram i ein artikkel som nyleg vart publisert av Universitetet i Bergen.

Uvisst
Sidan helseundersøkinga vart gjennomført over eitt år etter eksplosjonen hos Vest Tank, og der ikkje vart gjort undersøkingar verken før eksplosjonen eller rett etter, er det vanskeleg å seia om plagene har direkte samanheng med eksplosjonen og utsleppa derifrå, seier Hollund.

– Det kan også koma frå andre ureiningskjelder i Sløvåg, seier ho.
Ein vil no jobba vidare før å prøva å fastslå årsaka.

Nytt folkemøte
Det vart gjennomført ei spørjeundersøking i fjor haust som ei oppfølging av helseundersøkinga i 2008 og 2009, og rapporten frå denne undersøkinga vil verta lagd fram på eit folkemøte på Dalsøyra 29. november.

– Der vil me også orientera om den nye helseundersøkinga som skal setjast i verk neste år, fortel Hollund.