Auka salet med 25 prosent

Det er 3. juledag – den store bytedagen for julegåver, men folk forhastar seg ikkje med frukosten. Klokka 11.20 var det litt folk, men ikkje kø på Expert i Knarvik senter.

– Det er litt tidleg enno, men det tek seg opp etter lunsj, fortel Ronny Ottesen, dagleg leiar i Expert-butikken.

Han kan gleda seg over 25 prosent auke i julesalet samanlikna med i fjor.

– Me har hatt ein fantastisk vekst frå i fjor. Folk har pengar for tida og det merkar me. Dei handlar gjerne julegåver til seg sjølve òg. Me har selt ein del store LCD-fjernsyn – slike med 42 tommar eller større skjerm. I det rimelegare segmentet har me selt enormt av høgtalaren «Music Angel», seier Ottesen og viser til ein nesten tom produktkasse ved inngangen.

Denne har dei fylt opp mange gonger sidan dei fekk inn produktet.

– I løpet av knappe 14 dagar før julaftan selde me eit parti på 1000 av desse. Det gjekk mykje av dei før dette òg, blant anna fordi høgtalaren fekk toppkarakterar i eit lyd- og bildeblad. Eg har kjøpt fleire av dei som julegåver sjølv, seier Ottesen.

På Nordhordland Libris har folk bytt jamt og trutt sidan bokhandelen opna.

– Det er litt spennande at ingen har bytt boka «Hel ved» av Lars Mytting enno. Det er tydeleg at denne har falel i smak, for den selde me veldig mange av før jul, seier butikkmedarbeidar Cathrine Grasdal.

Fleire har derimot vore inne og byta bøker frå Bergens Tidende-serien «Tidsbilder fra Bergen». Nokre av dei byter i andre bøker frå serien, andre finn noko anna. Krimforfattarar som Jo Nesbø har ikkje folk bytt enno, sjølv om mange fekk hans bøker under treet i år.

– Folk kjem ofte inn i butikken i god tid før jul og spør etter desse bøkene, så dei vert ikkje bytte på same måte som gåvebøkene, fortel Grasdal som ikkje har noko imot å jobba i romjula.

– Det er berre kjekt å vera på jobb når folk er så blide og avslappa, seier ho.