Austrheim-nei til storkommune

Eit samrøystes kommunestyre i Austrheim gjekk tysdag inn for å avslutta prosjektet om framtidig kommunestruktur for Nordhordland. I Austrheim la politikarane til at ein bør satsa på forpliktande interkommunalt samarbeid der det er mest teneleg. Eit forslag frå Truls Bauge (Kystpartiet) om å halda fram drøftingane om kommunestruktur med Radøy og Gulen, vart ikkje vedteke.

Ja i Radøy
I Radøy sa eit samrøystes kommunestyre i førre veke ja til å arbeida vidare med å få fram konkrete modellar for omorganisering av tenestetilbod i ein eventuell endra kommunestruktur eller andre samarbeidsformer.
? Eg trur dette vedtaket er rett, og meiner at dei kommunane som har sagt bombastisk nei til vidare arbeid med saka har ei feil haldning. Det er altfor tidleg å kasta korta i denne saka, sa Ragnar Floen (Ap) under debatten i Radøy kommunestyre.
Ut frå tilbakemeldingane frå dei fleste andre kommunar i regionen kan ein sjå vekk frå endringar i kommunestrukturen i denne omgang. Men framleis vil det vera opning for å sjå på vidareutvikling av interkommunalt samarbeid.

Prosjekt til 900.000
Kommunane i Nordhordland har hatt ei økonomisk ramme på utgreiinga og informasjonsopplegget om kommunestrukturen på rundt 900.000 kroner.
Dette har dei fått tilskot til frå staten.
Regionrådsleiar Håkon Matre seier at sjølv om prosjektet no ikkje vert vidareført, har ein fått på bordet ei utgreiing om saka og har hatt ein del nyttige drøftingar. Matre er elles personleg for ei kommunesamanslåing i Nordhordland, som då hadde vorte den nest største kommunen i Hordaland.
? Gjennom ein stor kommune hadde det vore lettare å manøvrera regionen gjennom truslar og kunna utnytta dei moglegheitene som finst betre. Ein slik kommune hadde også fått større politisk tyngde til å fremja interessene til regionen, seier Matre.
? Må det eit stortingsvedtak til for at det skal skje?
? Dersom det skal skje dei første ti åra, må det nok det, seier Matre.

Positive innbyggjarar
Matre er elles overraska at utgreiinga viste at innbyggjarane i regionen var langt meir opne for ei kommunesamanslåing enn det politikarar flest trudde. Han meiner likevel at ei årsak til at prosjektet stoppa litt opp, er at det ikkje vart gjort nokon endringar i kommunelova knytt til dette med samkommune. Ei løysing for Nordhordland kunne vera å laga ei politisk overbygning over dei tenestene kommunane i regionen samarbeider om, til dømes innan renovasjon, brannførebygging og tekniske tenester. Styring av til dømes barnehagar og skular skulle etter denne modellen framleis liggja under det enkelte kommunestyret. Men dette vert det ikkje noko av no.