Austrheim planlegg idrettsanlegg til 20 millionar

? Me meiner det vil vera behov for å oppgradera idrettsanlegget i kommunen. Hallen er mykje brukt og det er eit «must» å ha eit godt tilbod til idrettsungdommen i lokalsamfunnet, seier driftssjef i Austrheim kommune, Olav Mongstad.

Sandvolley
Austrheim idrettslag har teke initiativ til idrettsanlegget, og har i fleire år vore i kontakt med kommunen for å få sett planane ut i livet.
Dei ønskjer å byggja eit idrettsanlegg i området ved Austrheim-hallen og Årås skule, og no har kommunen stilt planleggingsressursar til rådigheit.
? Det er alt i 2006 sett opp ein sum på 100 000 til planarbeidet med det nye idrettsanlegget, seier han.
 ? Det er flott at dei har med eit idrettsanlegg i økonomiplanen no, seier Helge Dyrkolbotn.
Han er leiar i prosjektgruppa som er sett ned for å arbeida fram skisser og planer om idrettsanlegget.
? Området rundt Årås skule og hallen har lenge vore planlagd til idrettsanlegg. Me har arbeida fram eit forprosjekt som tek planane for seg meir konkret, seier Dyrkolbotn.
Ønskjet er å få til ei fotballbane i kunstgras med løpebane rundt, tribune og høve til å driva med kast og hopp.
Det er og teikna inn areal som kan nyttast til mellom anna ei sandvolleyballbane og joggeløype.  
? Totalt ser me for oss at prisen kan liggja i overkant av 20 millionar. Då reknar me med tippemidlar og mykje dugnadsarbeid, seier Dyrkolbotn. Kommunen ser for seg at dei har romslegare økonomi i 2009, og økonomiplanen viser at 3,5 millionar er tenkt til idrettsanlegget.

Behov
? Fylkesmannen set ei lånegrense for kommunar som har hatt underskot i kommunerekneskapet. Kommunen får då låna like mykje som den betalar tilbake i avdrag kvart år. Austrheim skal vera ferdig med sine avdrag i 2008, og ser difor fram til ein sunnare økonomi i 2009, ettersom lånegrensa forsvinn, seier Mongstad.
Idrettslaget frå stadig innspel frå lokalsamfunnet om ulike behov. Det er mange som vil ha god nytte av eit slikt anlegg.
? Me ser heilt klart eit behov for ny fotballbane. At alt vert plassert ved hallen er og positivt. Det hadde vore veldig kjekt å få til dette anlegget, seier Dyrkolbotn.  No vert det arbeidd med å laga meir konkrete planar og prospekt som kan presenterast for kommune og skular.
? Anlegget er lagt inn i planen fordi kommunen ser at ein har høve til å arbeida med det slik som planen er no, seier Mongstad.