Avmagra hund inn i varmen

? Han er så snill, og har utruleg fine auge, seier Tarja Puntila.

Ho og mannen fann hunden tidleg måndag morgon, og har tatt seg av den sidan.

Rota i bosset

? Mannen min gløymde nistepakka, så eg sprang ut etter han med den. Då høyrde me at det rasla og bråka slik i bosspanna våre, og gjekk for å sjå kva det var. Me trudde først det var ein rev, seier ho.

Hunden var snill, tillitsfull og kjærleg frå første augneblink, og kom luskande bort til Puntila med ein gong.

? Han var så tynn. Det første inntrykket mitt var at han skulle falla saman. Når ein klappar han, kjenner ein alle knokar og bein. Dersom han har vore mishandla, er det heilt forferdeleg, seier ho.

På rømmen?

Puntila tok hunden med til dyrlege Dagfinn Berg for å finna ut kva som var gale med han.

? Då hunden kom hit, var den prega av eit liv på rømmen. Han var avmagra og hadde mage og tarmtrøbbel. Han hadde også feber, men heldigvis matlyst, seier dyrlege Dagfinn Berg.

Han meiner hunden er ei blanding mellom collie og setter, er mellom to og tre år gamal og usedvanleg snill og lydig. Hunden har også eit gamalt kutt over snuten.

? Dette er ei bikkje ein hugsar, og eg har ikkje hatt han her hjå meg før, seier Berg.

Vil behalde den

Dersom hunden har vore på rømmen, har han vore det lenge, meiner dyrlegen. No vert hunden hjå familien Puntila til ein eigar eventuelt melder seg.

? Hunden tiggar om kjærleik. Me har fem born, og hunden får kos heile tida. I tillegg har me erfaring med hundar frå tidlegare, seier ho.

Namn har dei ikkje gjeve hunden endå, i tilfelle den allereie har eit. Men borna i familien vil gjerne kalla han opp etter favorittmaten, Frolik.

? Me er veldig kresne når det gjeld hundar, men denne har me verkeleg falt for. Eg har svært lyst å behalda han, seier ho.